Las scolaras ed ils scolars èn s'inscuntrads quel di cun las acturas ed ils acturs, han visità ils differents locals e pudì dar in sguard davos las culissas. Sco highlight dal di han ils uffants dastgà esser da la partida tar ina preschentaziun da teater. Quella è vegnida menada si exclusivamain per els. Sper tut quai han adina puspè gì lieu rundas da barat, nua ch'ils uffants han pudì far lur dumondas als profis. Durant il di dal futur hai dà bler da vesair e far.
Nus avain dastgà far ils medems exercizis sco quai che las acturas ed ils acturs fan normalmain. Quai m’ha plaschì il pli fitg.
Durant in lavuratori han ils uffants emprendì co ch'ins pronunzia pleds a moda chapaivla ed exacta. Quai è vegnì exercità cun dir uschè precis e chapibel sco pussaivel ils pleds «Wachsmaske» e «Whiskymixer».
Ils uffants durant l'exercizi da discurrer
-
Bild 1 von 2. Bildquelle: RTR.
-
Bild 2 von 2. Bildquelle: RTR.
Vinavant han ils uffants raquintà tge che fascinescha els vi dal giugar teater. Ils ins han plaschair dal saut, auters da las differentas rollas e puspè auters stattan gugent davant il publicum.
Il di da l'avegnir dat als uffants la schanza d'emprender d'enconuscher ils agens interess e d'accumpagnar ils profis durant lur activitads professiunalas. Ed er sche betg tut las scolaras e tut ils scolars na vulan sa deditgar pli tard al teater, han tuts dastgà giudair in di divertent en il teater da Cuira.