Durant in di entir han passa 100 uniuns mussà tge ch'ellas fan e quai en differents lieus en l'entir chantun Grischun. Il segund di dal sport grischun ha gì lieu ils 17 settember en il rom dal giubileum da 50 onns da Giuventetgna+Sport. Vers 5'000 persunas interessadas èn sa participadas, scrivan ils organisaturs.
Co chattar ses sport preferì
Cun la purschida vasta da las bleras differentas uniuns n'èsi gnanc uschè simpel da sa decider per in sport. Tras gist sez pudair fufragnar ed empruvar ora las differentas disciplinas han ils uffants sco er babs e mammas pudì guardar tge sports che plaschan u tgenins betg.
Sper gist congualar ils differents sports in suenter l'auter è il di dal sport grischun er ina plattafurma impurtanta per las singulas uniuns da sport.
Jau na hai gnanc savì ch'i dat a Tenna ina uniun da gimnastica.
Bel saja era che betg be presidentas u trenaders da las singulas uniuns eran là, mabain er uffants ch'èn activs en quellas uniuns. Uschia han ils uffants pudì preschentar lur sport ad auters uffants.
Ina vita per l'uniun
Uniuns da sport accumpognan blers uffants durant lur uffanza. Per intginas ed intgins restan ellas dentant er pli tard anc ina constanta da la vita. Saja sco trenadra u commember en suprastanza. Per Claudia Niggli constat quai. Ella ha cumenzà a giugar ballarait en la societad da gimnastica da Samedan cura ch'ella era en il stgalim aut. Anc oz, cun 51 onns, è ella commembra activa, actualmain era cassiera da l'uniun.
Ina plattafurma impurtanta
Per uniuns pli pitschnas èn occurrenzas sco il di dal sport grischun impurtantas per sa mussar. Uschia han ins pudì empruvar ora durant l'occurrenza en ils differents lieus differents sports pauc enconuschents, sco tranter auter pingpong, curling, discgolf, lacrosse, capoeira e swaveboard.
Il di dal sport grischun è vegnì inizià da l'Associaziun grischuna dal sport en collavuraziun cun grischunSPORT. Set comités locals han organisà l'occurrenza a Cuira, Tavau, Landquart, Glion, Samedan, Scuol, Mesocco e Tusaun.
E per meglierar la purschida da Giuvetetgna+Sport ha l'Uffizi federal da sport fatg ensemen cun differentas universitads da la Svizra in studi davart la dumonda quant fitg ch'ils uffants e giuvenils en Svizra sa muventan.
Or da l'archiv
