Tgi enconuscha? I capita gist insatge nunspetgà ed ins vul dispit raquintar quai a la meglra amia u al bun ami. Il pli gugent subit, face to face e sche pussibel anc cun in bun drink. Pli simpel ditg che fatg. Bleras amicizias vivan en il decurs dal temp betg pli al medem lieu nundir en il medem vitg u en la medema citad. Lavur da famiglia u in job intensiv fa tut in zic pli cumplitgà – in dilemma che bleras e blers da nus enconuschan.
Far midada en in auter lieu sa senta in zic sco mal d'amur
Uschia vai era a Mirjam Pinzger ed a Seraina Geilinger. Omaduas dal Grischun, omaduas han studegià a Turitg, omaduas èn daventadas mamma a Turitg, dentant è mo ina restada en la citad. Quai saja schon stà ina detga midada, raquinta Mirjam Pinzger. La dunna da 37 onns ch'ha fatg il pass davent da la citad ed abita dapi in onn cun sia famiglia a Mels, di che quella midada na saja betg mo stada ina simpla decisiun – era pervia da las amias. E cler, l’entschatta saja quai schon stà da s'endisar. Dentant cun in zic organisaziun giaja quai schon. Sche ins vul propi giaja tut.
La psicologa e mumentan terapeuta en scolaziun, Stephanie Karrer, declera ch'ina midada, sco per exempel tuttenina viver en in auter lieu, possia perfin era sa sentir in zic sco mal d’amur. I na dependia era betg quant gronda che quella distanza saja – in ura u quatter uras. Distanza saja distanza. E quai vegnia bleras giadas sutvalità. Tge che gidia saja d’acceptar quella tristezza e discurrer surlonder, uschia la psicologa. Communicaziun è fitg impurtanta!
... distanza è distanza – tuttina quant gronda che quella è.
Las pitschnas chaussas dal mintgadi è quai che quinta
Las duas amias Mirjam Pinzger e Seraina Geilinger han chattà per ellas in bun medium per restar à jour. Ellas fan regularmain messadis pledads, nua ch’ellas raquintian da grondas e pitschnas chaussas dal mintgadi. Il bler sajan las pitschnas chaussas quai che fa ora ch'ins sa sentia datiers ina a l’autra.
Quai po era la psicologa Stefanie Karrer confermar. Ella accentuescha vinavant ch'ins na stoppia betg sa vesair per sa sentir datiers. Ins possia era telefonar u tarmetter fotos, u sco en il cas da las amias, trametter messadis pledads. Impurtant saja ch’ins stettia en barat, uschia creesch'ins proximitad e quai mantegna la relaziun.
La fin duess la relaziun cun la meglra amia sa sentir sco da trair en ina chautscha cumadaivla da trener – tuttina nua ch'ella viva.