Baiver in magiel aua fraidischma: Quai empermetta da rinfrestgar. Ed er sch'il sentiment è agreabel, poi er avair effects secundars, numnadamain in gramfli dal venter. Lura piglia il corp si pli pauc liquid. Gist tar temperaturas chaudas n'è quai betg ideal – ins duai gea baiver avunda. Ch'il corp dovri dapli energia per stgaudar si l'aua fraida e ch'ins sua perquai dapli, è dal rest in mitus.
E tge trair en? Il meglier vestgadira curta e clera? Er quai è be in mitus. Pel niva sa stgauda numnadamain pli spert che pel cuvernada. Vestgadira clera reflectescha dapli radis dal sulegl – ella na vegn pia betg uschè chauda sco vestgadira pli stgira. Vestgadira stgira protegia dentant meglier cunter ils radis dal sulegl. Ideal è vestgadira lucca. Uschia po l'aria circular, e quai gida da restar pli frestg.
Evitar lieus chauds
Las temperaturas varieschan fitg, tut tenor regiun climatica, autezza sur mar ubain, vent e numerus auters facturs. In dals lieus ils pli chauds en Grischun è Biasca – e quai ord plirs motivs, declera Jürg Zogg da SRF Meteo. Il lieu è be var 280 meters sur mar. Plinavant na datti nagin aual u lai pli grond en vischinanza. Quels gidan numnadamain da rinfrestgar. Plinavant è la vallada relativ stretga. Pli stretga vul dir pli pauc volumen d'aria – ed uschia pli pauc aria ch'il sulegl sto stgaudar.