Siglir tar il cuntegn

Header

cuntegn

Grischun Dischoccupaziun è tschessada il 2018

En il Grischun sco er vis sur l'entira Svizra è la dischoccupaziun tschessada l'onn 2018.

En il Grischun era la quota da dischoccupaziun l'onn 2017 en media tar 1,5%. L'onn passà è quella quota sa reducida per 0,2 puncts procentuals sin 1,3%. Quai correspunda a 2640 persunas dischoccupadas. Uschè paucs dischoccupads n'hai dapi la crisa da finanzas l'onn 2008 betg pli dà en il Grischun.

audio
La situaziun en Grischun declerada en 60 secundas
ord Novitads dals 08.01.2019.
laschar ir. Durada: 51 Secundas.

En l'entira Svizra è la quota da dischoccupaziun tschessada da 3,2% (2017) sin 2,6% l'onn 2018. Uschia ha annunzià il secretariat statal per economia, Seco.

Cun economia svizra giaja bain

Tenor il Seco mussan las cifras ch'i giaja bain cun l'economia svizra. Plinavant saja il martgà da lavur en in bun stadi. Il dumber da dischoccupads saja ids enavos fin il fanadur e saja suenter restads sin in nivel bass.

Motivs stagiunals

A partir dal november saja il dumber da dischoccupads puspè creschì, quai pervi dad effects stagiunals. La fin december eran 1'653 persunas en il Grischun senza lavur. Las pli bleras persunas dischoccupadas datti en l'industria da construcziun (685), en l'hotellaria (205), tar la sanadad publica e socialesser (87), en il commerzi en detagl (76) sco er en ulteriuras prestaziuns economicas (72).

En l'entira Svizra muntava il dumber da dischoccupads il december a 120'000 persunas.

Emploiads pli vegls na profiteschan betg

Dal schlantsch sin il martgà da lavur profiteschian emploiads pli vegls memia pauc. A quella conclusiun vegn l'uniun tetgala dals sindicats Travail.Suisse. Tar persunas sur 50 saja la quota da dischoccupaziun be sa reducida mez uschè fitg sco la quota generala. Quai confermia er il maletg dals ultims onns: La dischoccupaziun tar talas persunas saja surproporziunala, uschia Travail.Suisse.

RR novitads 08:00+

Artitgels legids il pli savens