Siglir tar il cuntegn

Header

audio
La dretgira Alvra ha sentenzià dus chatschadurs ch'èn marschads tras asil da selvaschinas
Or da Actualitad dals 29.09.2021.
laschar ir. Durada: 04:56 minutas.
cuntegn

Dretgira regiunala Alvra Sentenzià chatschadurs ch’èn marschads tras asil da selvaschina

Ils dus chatschadurs hajan prendì en cumpra da spaventar selvaschina or da l’asil. La dretgira Alvra ha sentenzià ils dus frars il matg passà. Els recurran cunter la sentenzia e la dretgira chantunala sto uss sa fatschentar cun la chaussa.

L’emprim di da chatscha, il settember 2019, surpassan ils dus catschadurs las 3:00 la notg il cunfin da l’asil da chatscha dal Piz Ela. Il guardiaselvaschina trapla ils dus frars ch’èn munids cun schluppets a marschond tras l’asil.

Fatg aposta u prendì en cumpra?

La procura publica renfatscha als dus frars d’avair vulì chatschar tschiervs or da l’asil en direcziun da Platta Gaglina per che lur collegas da chatscha possian sajettar là dapli animals.

La saira avant hajan ils collegas raquintà ad els en chamonna d’avair vis radund trenta tschiervs en l’asil e diesch tschiervs gist al cunfin da l’asil.

La via pli curta

Els hajan be vulì prender la via curta per vegnir tar lur posts da chatscha, èn ils dus frars sa defendids avant dretgira. Dad ir dador enturn fiss stà stentus pertge in dad els saja stà malsaun.

Els n’hajan mai vulì chatschar tschiervs or da l’asil. E sch’els avessan tuttina spaventà selvaschina, fissan ils animals fugids pli profund viaden en l’asil e betg sur ils cunfins, han ditg ils dus frars che van gia dapi onns a chatscha en questa regiun dal Surses.

Plinavant sajan ils tschiervs en l’asil stads per gronda part animals scumandads. I na fiss pia gnanc stà pussaivel da sajettar els.

Nagin perdun da la dretgira

Ils dus frars hajan agì cun intenziun eventuala. Sco chatschadurs versads hajan els savì ch’i saja pussaivel ch’els disturbian selvaschina sch’els passian tras l’asil, ha la dretgira regiunala argumentà en sia sentenzia. Ils dus chatschadurs n’hajan betg pudì excluder che gist las tscharvas damanaivel dal cunfin fuigian or da l’asil.

Lur sa cuntegnair saja stà egoistic e l’argument da mo avair vulì prender la via curta na saja betg relevant. Il chatschadur malsaun avess pudì desister da la chatscha u tscherner in post pli damanaivel.

Custs procedurals ensalads

La dretgira Alvra sentenziescha in frar ad in chasti pecuniar cundiziunà da 20 schurnadas à 370 francs ed ad ina multa da 1'400 francs. Plinvant ha el da purtar custs da dretgira e procedurals da radund 6'700 francs.

L’auter frar vegn sentenzià ad in chasti en daner cundiziunà da 20 schurnadas à 120 francs ed ina multa da 500 francs. El ha da purtar custs da dretgira e procedurals da radund 5'700 francs.

Ad omadus chatschadurs vegn retratga per dus onns la patenta, sch’els commettan in ulteriur delict. Il cas è uss pendent tar la dretgira chantunala.

RTR novitads 12:00

Artitgels legids il pli savens

Scrollar a sanestra Scrollar a dretga