Cunzunt ils uffants dian min empè da giat u giattel. Ma era creschids – tuttavia da saun intelletg – cloman e carmalan lur minzi cun faviala miaivla e charina.
Il Dicziunari Rumantsch Grischun (DRG) enumerescha scientificamain variantas pussaivlas: min, mini, mimin, minali, mincal, mincalin, minet, miniet, minin, minign, minun, minimuni, minmin, minminzi eav.
Ma min signifitgescha anc autras chaussas:
- Sch’insatgi a Lantsch dumonda Ast soi minets? vul quai dir Has plugls?
- Min vegn era duvrà per lieurets u pitschnas muntanellas.
- Ils pitschens puschels che creschan la primavaira sin chaglias pon ins era numnar mins.
- Minchis, mincs u minis munta munaida u daners.
Il DRG tradescha era, nua che la litteratura rumantscha scriva da mins. Qua exempels da trais idioms:
- «Chegl marscha tar me! Prest tot las tgombras gio occupadas? E tot da chels digls minnigns mellens.»
- «Ils da Tujetsch denton van ella schanuglia avon mintga leischen, sch’ei fredan mincs.»
- «Schi baincomal è’l cagiò, il min brün, ün uorsun sco üna pigna.»