Siglir tar il cuntegn

Header

in taxi.
Legenda: Keystone.
cuntegn

Dus munds differents Taxists en la periferia ed en la citad

En sasez fan els la medema chaussa. Ir cun in client da punct A tar punct B. E tuttina datti grondas differenzas tranter in taxist en ina regiun periferica ed en la citad. Dus taxists raquintan da lur mintgadi.

Mario Camartin ha gronda experientscha en la branscha da taxis. Dapi ils onns 1980 ha el in'atgna fatschenta da taxi a Breil. Avant ha el lavurà a Turitg – era sco taxist. El declera che quai sajan dus munds differents.

Per la periferia è il turissem essenzial

Tenor Martin Camartin n'haja el a Turitg mai stuì far quitads ch’i na dettia nagina clientella. A Breil percunter saja il mantegniment da contacts e clients regulars fitg impurtant. Ed era il turissem saja fitg impurtant. Cunzunt en la stagiun da skis saja il «Taxi Mario» fitg tschertgà.

Mario Camartin.
Legenda: Mario Camartin na vuless betg midar da Breil en ina citad. RTR, Lukas Quinter.

Tgi che giaja cun taxi en ina regiun periferica, dovria ina buna organisaziun, declera el. Ils viadis ch’el fa savens na sajan betg be 1 fin 2 kilometers lungs – sco quai ch’igl è savens il cas en citad. Ils viadis giajan savens dad ina vallada en l’autra. Uschia stoppian ins savair exact, quant ditg ch’ins haja d’in punct tar l’auter, per esser ad uras tar il client.

En la citad dirigia il squitsch da temp

L’Engiadinaisa Nelli Hafen lavura dapi 8 onns tar «Taxi Pino» a Cuira. Per ella saja il traffic en la citad ina da las pli grondas sfidas. Ella declera la problematica uschia:

Blers velos e blers uffants sin via da scola. Jau na vi betg ch’ina persuna sa tschenta sin mes viertgel da motor, na grazia
Autur: Nelli Hafen
Nelli Hafen.
Legenda: Dapi 8 onns èn in dals taxis a Cuira: Nelli Hafen. RTR, Lukas Quinter.

Per Nelli Hafen ha la segirtad la pli gronda prioritad. Cunquai ch’i stoppia tuttina ir spert dad A a B, saja quai magari in dilemma. Per part saja la glieud en citad pli pretensiusa pertutgant il temp. Els na spetgian betg gugent ditg sin in taxi.

RR actualitad 11:00