La finamira da las frestgeras da «Madame Frigo» è da salvar vivondas dal rument. Tgi ch'ha rests sco per exempel fritgs, legums u rauba da pasta ch'el na po betg duvrar ha la pussaivladad da deponer las vivondas en la frestgera publica. Mintgin e mintgina po deponer rauba en la frestgera e sa servir dals products deponids.
«Madame Frigo» a Cuira
La frestgera publica a Cuira sa chatta a la Ringstrasse 13 tar la IBC a Cuira, ella è en funcziun dapi in mais. Tgirada vegn ella dad ina pitschna gruppa da voluntarias. Ina da las iniziantas è Livia Tanner. Sin l'dea da realisar in tal project er a Cuira è la dunna da 29 onns vegnida perquai ch'ella enconuscheva «Madame Frigo» da Turitg, nua ch'ella ha vivì pli baud. Cun l'entira organisaziun e l'entira birocrazia è passà in temp fin che la frestgera è stada installada mez settember. Per s'infurmar e sa barattar datti in chat. Entant fan radund 40 persunas da Cuira e conturn part da quel. Ils resuns che Livia Tanner ha fin ussa survegnì èn positivs, quant stedi che la purschida vegn duvrada è anc grev da dir. I dovra en mintga cas anc in zic temp. Sche insatge va en vacanzas u spontan davent per inqual dis è la frestgera publica ina buna pussaivladad da spendrar vivondas. E tgi che passa tar «Madame Frigo» avant che far cumissiuns po forsa duvrar insatge or da la frestgera ed uschia spargnar raps ed il medem mument gist er far insatge per l'ambient.
Da l'idea da studentas fin 106 frestgeras publicas
Las frestgeras publicas da «Madame Frigo» èn sa svilupadas ord in'idea da quatter studentas da Berna ch'han vulì far insatge cunter foodwaste. Il 2014 avevan ellas installà a Berna las emprimas frestgeras publicas. Dapi il 2018 han las frestgeras num «Madame Frigo», fin oz datti 106 da quellas en las chamonas pitschnas melnas en l'entira Svizra. L'organisaziun «Madame Frigo» è in'uniun d'utilitad publica da non profit cun sedia a Lucerna. Finanziada vegn l'organisaziun dal tuttafatg da donaziuns, raps da differentas fundaziuns e sponsurs. Uschia sponsurescha per exempel ina gronda marca d'apparats electrics las frestgeras. Tgiradas vegnan ellas da voluntaris e voluntarias. L'onn passà sajan uschia vegnidas spindradas radund 150 tonnas mangiativas dal rument, quaj sajan circa 400 kg per mintga post cun ina frestgera publica.
Igl è fitg bel che uschè blers voluntaris s'engaschan cunter foodwaste e tgiran las frestgeras publicas.
Singuls posts hajan er ina cooperaziun cun ina stizun, pasternaria u in restaurant en il quartier che mettian a disposiziun lur rests en la frestgera. Ils products che vegnian purtads il pli savens èn legums u fritgs e rauba da pasta.
«Too good to go» – in'app cunter sfarlattim da mangiativas
Per evitar il sfarlattim da mangiativas pon ins duvrar l'applicaziun cun num «Too Good To Go». Cun quella app pon ins cumprar products e spaisas da restaurants e butias per in pretsch fitg favuraivel. L'idea è: Pli gugent vender favuraivel che bittar en il rument.
Il princip è simpel: En l'app arcuneschan ins infurmaziuns persunalas e la carta da credit. Silsuenter pon ins dar en il numer postal, ils restaurants en vischinanza cumparan. Lura pon ins eleger in'ustaria che porscha rests da mezdi u la saira. Quels menus custan mintgamai 5,90 francs. Tge spaisas ch'ins survegn la fin finala, è ina surpraisa – tut tenor tge ch'è restà enavos en il restaurant. Tut ils menus ch'ins po cumprar han dentant d'avair ina valita da var 20 francs.
Gia quatter onns datti la purschida en Svizra. En l'entira Svizra datti gia 5'500 partenaris che cumbattan cun l'app il sfarlattim da mangiativas. En il chantun Grischun datti 150 partenaris. «Too Good To Go» fadia vi da mintga pac che vegn spendrà. Numnadamain 2,90 Francs da mintga pachet da vivondas vendì va sin il conto da la fatschenta. Quels raps dovrian els per tgirar e meglierar la plattafurma. En nagin cas veglian els concurrenzar autras organisaziuns che s'engaschian encunter il sfarlattim da vivondas, accentuescha il manader da la vendita Lukas Guidali. Uschia sustegnian e collavurian els cun differentas autras organisazins. Er dettia atgnas campagnas per sensibilisar e far attent a la tematica – sco per exempel «oft länger gut» che duai demussar che bleras vivondas sajan anc giudaivlas era cura che la data da conservaziun minimala saja currida giu.