Unicamain bar saja il vair è l'opiniun dals gastronoms dumandads en chaussa. Uschia na resultan nagins custs da taxas e cumissiuns per in servetsch. Natiralmain na saja quella opziun betg ina via ed in'ustaria u hotel stoppian porscher la pussaivladad da pajar cun cartas da credit, TWINT u digital cun il telefonin. In stausch haja il pajar cun carta fatg il temp da la pandemia. Il giavisch da pajar senza contact ed uschia betg bar saja creschì immens quel temp ed ussa sajan ils giasts sa disads da pajar er il café cun carta.
Pli pauc bunamaun
Franz Sepp Caluori, il president da Gastro Grischun, fa attent il medem mument che er la part dal bunamaun saja s'empitschnida marcantamain per il persunal da service cun pajar adina pli savens cun carta e digital. Sch'i vegn pajà cun carta ed arrundà ensi la summa, sajan dumandads ils singuls manaschis co tractar quai. La differenza possia per exempel vegnir scumpartida sin l'entir team – da la cuschina enfin al persunal a la front.
