Siglir tar il cuntegn

Header

Navigaziun

Logo per il di da la chauma vi d'ina giacca.
Legenda: Ils 14 da zercladur fan las dunnas chauma. Keystone
cuntegn

Egualitad da dretgs Unfisas da spetgar sin l’egualitad

Sut il motto «Gleichberechtigung. Punkt. Schluss!» datti ils 14 da zercladur chaumas en Svizra. En tut ils chantuns èn planisadas acziuns e protestas da dunnas.

Las chaumadras vulan far chommas a la politica ed als patruns. Dapi 40 onns stat scrit en la constituziun che um e dunna hajan ils medems dretgs e survegnian la medema paja per las medemas prestaziuns. Il motto da chauma signifitgescha che bleras dunnas èn unfisas, che l’egualitad garantida en la constituziun, n’è suenter tants decennis anc adina betg realitad.

Sanestras e burgaisas

Lantschà la chauma han ils sindicats gia la fin da l’onn passà. Uss mobiliseschan dentant pliras grondas organisaziuns da dunnas. I n’è pia betg mo ina protesta da dunnas sanestras, mabain ina chauma che vegn purtada era dad organisaziuns burgaisas sco Alliance F u dad uniuns da dunnas catolicas e refurmadas.

Tut tenor tge organisaziun che cloma da far chauma sa differenzieschan las pretensiuns. En il center stattan dentant dapertut: pajas egualas, dapli scheffas en interpresas e che la violenza cunter dunnas vegnia finalmain cumbattida datschertamain.

Far chauma gida

Gia il 1991 han tschientmillis da dunnas fatg chauma. Lezza giada era il motto «Wenn Frau will, steht alles still!». Igl è stà ina da las pli grondas manifestaziuns ch’igl ha dà insacuras en Svizra. Suenter ha la politica reagì. Ins ha per exempel mess en vigur la lescha d’egualitad, introducì il splitting tar l’AVS e chattà ina soluziun per l’interrupziun da la gravidanza.

Tge marscha en il Grischun?

Ils 14 da zercladur datti sin l’Alexanderplatz a Cuira teater, musica e stans per s’inscuntrar e discutar. A las 15.30 cumenza sin il Kornplatz il «power-marsch» atras la citad veglia.

Plinavant datti pliras acziuns regiunalas u localas sco per exempel da las dunnas da Domat u en l’Engiadina. Ina pitschna survista chattan ins sin la pagina d’internet da l’Uniun sindicala dal Grischun.

RR actualitad 12:00