Il candidat da la PBD Jon Domenic Parolini è elegì sco tschintgavel cun 15'904 vuschs en la regenza. Walter Schlegel da la PPS vegn sin 15'836 vuschs. Quai èn mo 68 vuschs pli pauc. La lescha chantunala davart ils dretgs politics pretenda ina nova dumbraziun sche la differenza è pli pitschna che 0,3%.
Sco Daniel Spadin, schef da la chanzlia chantunala, di stoppian ins uss spetgar giu ils protocols da las vischnancas e lura anc ina giada controllar quels. Quels protocols ston esser enfin mardi saira tar la Chanzlia chantunala dal Grischun. Sche las cifras restian uschia sco uss, lura vegnia quai a dar ina nova dumbraziun. Daniel Spadin fa quint venderdi proxim cun ils resultats definitivs.
-
Bild 1 von 2. Jon Domenic Parolini ha mo per paucas vuschs dumagnà la reelecziun. Bildquelle: RTR, Flavio Deflorin.
-
Bild 2 von 2. Walter Schlegel ha bain cuntanschì la maioritad absoluta. El è dentant be sin la sisavla plazza. Bildquelle: RTR, Flavio Deflorin.
Il scandal da construcziun sco motiv principal
El haja schon fatg quint ch'i vegnia stretg per el, di Jon Domenic Parolini. Il resultat saja dentant d'acceptar. Era tar Walter Schlegel datti nagut auter che dad acceptar il resultat. Ch'ina nova dumbraziun savess anc midar il resultat na crai Schlegel plitost betg. El saja realist e sappia, ch'ina nova dumbraziun savess exact uschè bain mussar ina pli gronda differenza tranter els dus.
Tant Walter Schlegel sco er Jon Domenic Parolini èn da l'avis, che l'istorgia enturn las cunvegnas da pretsch en la branscha da construcziun hajan custà ad els vuschs.
RTR elecziuns