En ina communicaziun a las medias ha annunzià la Partida liberaldemocratica PLD las emprimas trais persunas, ch'èn prontas da sa metter a disposiziun per l'elecziun en il Cussegl naziunal l'onn 2019.
Finamira PLD: A la reconquista da «ses mandat»
Il comité da la PLD. Ils Liberals Grischun haja prendì cogniziun «cun grond plaschair dal fatg che trais persunalitads sajan sa decleradas prontas da candidar communablamain» per in sez en il Cussegl naziunal. La finamira da la PLD saja da gudagnar enavos «ses mandat» en il Cussegl naziunal, scriva la partida en la communicaziun.
Il mandat avevan ils liberals grischuns pers avant otg onns: Dal 2011 era ì il verd-liberal Josias Gasser cun il sez da Tarzisius Caviezel. En las elecziuns avant quatter onns era lura ida Magdalena Martullo-Blocher per la Partida populara svizra PPS cun il mandat da Gasser.
Cusseglier guvernativ Rathgeb definitiv betg pli en la cursa
Malgrà ch'il Cusseglier guvernativ Christian Rathgeb aveva communitgà cleramain da betg esser interessà vi dad ina candidatura era el adina puspè vegnì numnà sco opziun.
Cun l'annunzia da la gievgia para questa dumonda ussa dad esser respundida per dal bun.
Nominaziun uffiziala ed eventualas ulteriuras glistas anc avertas
Tar la communicaziun sa tractia quai dad in'annunzia. La nominaziun uffiziala saja anc da far. Els trais sajan dentant sa declerads pronts gia uss da vulair gudagnar enavos «il sez da la PLD».
Anc avert lascha il comité da la PLD, sch'i dettia ina segunda glista cun candidats da las regiuns u er autras glistas. Ils candidats da quellas na sajan anc betg enconuschents, concluda la partida sia annunzia.
RR novitads 17:30
