Siglir tar il cuntegn

Header

video
Rathgeb vs. u pro Giacometti?
Or da Telesguard dals 19.10.2022.
laschar ir. Durada: 3 minutas 17 Secundas.
cuntegn

Elecziuns 2023 Christian Rathgeb candidescha per Cussegl naziunal

Il cumbat electoral dal Grischun per las elecziuns federalas 2023 è gia lantschà. Il cusseglier guvernativ e schef dal departament da finanzas Christian Rathgeb stat a disposiziun per las elecziuns dal Cussegl naziunal. Tant el sez sco er il president da la partida liberaldemocratica Bruno Claus han confermà quai envers RSI.

audio
Rathgeb: «Jau ma met a disposiziun per sustegnair Anna Giacometti»
ord RTR Audio dals 19.10.2022.
laschar ir. Durada: 12 Secundas.

Uffizialmain ina candidatura da sustegn

Sia motivaziun principala saja da segirar il sez da la partida ch'è vegnì reconquistà il 2019. Cler, er el avess gust da far il pass en la Chombra gronda. En ses 11 onns en la regenza grischuna haja el gì bler da far cun Berna e vis l'impurtanza da las decisiuns dal parlament naziunal a Berna per il chantun Grischun. Ses temp en la regenza chantunala va a la fin quest onn e cun 52 onns faschess el gugent vinavant politica – e quai numnadamain là nua ch'ins haja in'influenza.

En mes temp en la regenza hai jau gì bler da far cun Berna ed hai vis l'impurtanza da las decisiuns da la Confederaziun per il Grischun.
Autur: Christian Rathgeb Cusseglier guvernativ e candidat per il cussegl naziunal

Christian Rathgeb

Avrir la box Serrar la box

Rathgeb è cusseglier guvernativ e schef dal departament da finanzas e vischnancas. Tar las elecziuns chantunalas il 2018 aveva el ramassà las pli bleras vuschs. El è era president da la conferenza dals chantuns, quai dapi il 2020 ed anc fin la fin da quest onn. Il 2020 è el era stà president da la regenza grischuna.

Che la candidatura da Christian Rathgeb na saja nagina cuntercandidatura ad Anna Giacometti ha er sincerà il vicepresident da la partida Maurizio Michael. El na chattia er betg ch'ins gioga uss ora dus candidats da renum in cunter l'auter. Mintgin e mintgina che candideschia per in tal post saja conscient da las consequenzas ch'ina candidatura portia; e Michael è persvas ch'era autras partidas vegnan ad avair fermas candidaturas da sustegn per ils cussegliers e las cusseglieras naziunalas en uffizi.

audio
Christian Rathgeb candidescha per il Cussegl naziunal
ord Actualitad dals 19.10.2022. Maletg: RTR
laschar ir. Durada: 2 minutas 47 Secundas.

Grond gudogn per partida

Davart l'intenziun da ses collega da partida ha la cussegliera naziunala Anna Giacometti ditg envers RSI ch'ella saveva che Rathgeb vuleva candidar. Per la partida saja questa candidatura in grond gudogn, uschia la politicra bregagliotta.

audio
Anna Giacometti: «Per la partida è questa candidatura in grond gudogn
ord RTR Audio dals 20.10.2022.
laschar ir. Durada: 11 Secundas.

Davart la dumonda sche la candidatura da Christia Rathgeb pudess periclitar sia posiziun, n'ha Giacometti betg vulì prender posiziun. Enconuschent è dentant ch'ella veglia er en avegnir anc restar a Berna.

RTR novitads 07:00

Artitgels legids il pli savens