Las singulas partidas vulan metter sin lur glistas uschè bleras candidatas e blers candidats adattads sco pussaivel per las elecziuns en il Cussegl grond. Dapi l'onn 2022, uss pia per la segunda giada, vegnan las deputadas ed il deputads elegì cun il proporz dubel.
Las partidas grondas van cun uschè bleras persunas sco pussaivel en la cursa
La finamira da las quatter partidas grondas (il Center, la PS, la PLD, la PPS) saja da pudair proponer uschè blera glieud sco pussaivel ed il pli gugent in candidat u ina candidata per mintga sez en il Cussegl grond – pia 120 en tut.
Da princip èn 120 persunas dumandadas: ina candidata u in candidat per mintga sez en il Cussegl grond dal chantun.
Enfin uss han la Partida liberaldemocratica, la Partida socialdemocratica e la PPS chattà mintgamai rodund 100 candidatas e candidats. Il Center n'ha betg tradì lur dumber exact.
Sin buna via e cuntentas sajan tut las partidas actualmain. Rimnar las davosas persunas per la candidatura saja dentant adina il pli grev, di Joshua Wada da la PS.
Partida verd-liberala e la Verda Grischun vulan daventar pli prominentas en las regiuns
La Partida verd-liberala è per il mument represchentada en 17 cumins cun 42 candidatas e candidats – la finamira fissi dad ir en la cursa cun 50, sco avant quatter onns. Ella vulan defender ses set sezs.
L'emprima finamira è che nus cuntanschian puspè fermezza da fracziun, almain tschintg plazs. Ma natiralmain vulain nus defender ils set sezs e sche pussaivel extender quels.
La Verda Grischun ha chattà fin uss 45 candidatas e candidats che vulan vegnir elegids en il Cussegl grond quest onn, ideal fissan tenor Anita Mazzetta 60 fin 70. La partida haja duas finamiras: emplenir las glistas ed avair dapli preschientscha regiunala en l'entir chantun.
Tschertgar persunas per la candidatura: Lavur, lavur ed anc ina giada lavur
Bleras uras da lavur sajan necessarias - gia avant las elecziuns- per tschertgar tut quellas candidatas e quels candidats, quai han tut las partidas communitgà.
Jau crai che quai è tar tut las partidas circa tuttina: Ins sto telefonar a la glieud, discurrer, persvader. Quai n'è betg ina lavur che sa fa da sasez. Quai è lavur, lavur ed anc ina giada lavur.
Spezialmain en ils circuls electorals pitschens - ils uschenumnads circuls electorals dad in, sco per exempel Mesauc u Stussavgia - saja difficil da chattar candidatas e candidats adattads. Savens na veglian las persunas betg candidar encunter persunas ch'èn gia vegnidas elegidas ina u pliras giadas.
Las partidas han anc temp fin l'entschatta mars da registrar lur candidatas e lur candidats per las elecziuns en il Cussegl grond che han lieu ils 14 da zercladur.
