La cuverta cun las glistas ed ils flyers cun si las fatschas da tut las candidatas ed ils candidatas per las elecziuns da dumengia èn gia dapi intginas emnas en las chasadas grischunas. E sche la participaziun d'eleger vegn ad esser en il medem rom sco avant quatter onns, alura munta quai che dapli che la mesadad da quellas cuvertas sa tschentan u èn gia sa platgadas en il palpiri vegl, empè d'arrivar tar las vischnancas. Il 2019 avevan numnadamain mo radund 43% da las persunas cun dretg d'eleger dà giu lur vusch.
Guardain sco ch'i vesa or per il mument en differentas vischnancas grischunas – intgins dis avant las elecziuns naziunalas.
Sisum la Surselva, a Mustér ha il president da vischnanca, René Epp la survista.
Enfin il di dad oz èn radund 300 cuvertas vegnidas inoltradas. Quai è radund 20% da la populaziun che dastga votar en nossa vischnanca.
El è optimistic che vegnia a dar ina gronda participaziun. Quai dentant betg exnum pervia da las elecziuns federalas, mabain plitost pervia da las votaziuns communalas. A Mustér vegn dumengia sper las elecziuns era votà davart dus projects solars.
Midain da l'autra vart da la Surselva, tar la vischnanca Ilanz/Glion. Ella è ina da las vischnancas che na fa nagina statistica ordavant, explitgescha il manader da la chanzlia, Michael Spescha.
Enfin uss rimnain nus las cuvertas che vegnan enavos en stgatlas. Cun la permissiun da la chanzlia chantunala cumenzain nus lura gievgia a sortir il material da votaziun.
Sche nus giain da Glion in toc pli a bas ed al nord cuntanschain nus la chapitala grischuna. Auter che a Glion vegnan dumbradas a Cuira las cuvertas mintga 2 dis. La survista ch'è vegnida publitgada glindesdi suentermezdi mussa var 20% participaziun.
Da Cuira en direcziun sid arriva ins suenter radund 30 km en lingia directa tar la vischnanca da Surses.
Circa 1/3 han votà enfin ussa en scrit.
Il mastral da Surses, Leo Thomann manegia che quai saja en il rom ordinari da las elecziuns federalas dals ultims onns.
Tar ils collegas sin l'auter maun dal Pass dal Güglia, a San Murezzan sappian ins per il mument betg dir cifras exactas, di la chanzlista communala suppleanta, Gabi Bogner, ma...
Mumentan è il cumportament d'eleger en il rom d'avant quatter onns. Nus n'avain naginas grondas differenzas.
Ed in toc giu per l'En, a Scuol, para er tut d'esser en il rom da l'usità. Raquinta il chanzlist Andri Florineth.
Entant avain nus var 17% ch'han dà giu lur vusch.
Per finir la pitschna «tour de Grisons» politica platgain nus anc a Lon. Avant quatter onns aveva la pitschna vischnanca cun var 50 abitantas ed abitants ina participaziun da varga 73%. La pli auta da l'entir chantun. Oz è Lon fusiunà e furma ensemen cun Donat, Casti-Vargistagn e Maton la vischnanca «Muntogna da Schons». Entant sajan vegnidas inoltradas 40 cuvertas d'elecziun. Tge che correspunda ad ina participaziun intermediara da radund 14%. La chanzlista Tina Sulser va or da quai che la blera glieud vegn a dar giu lur vusch la dumengia a l'urna. Sche tanscha er quest onn per daventar la vischnanca cun la pli auta participaziun vesain nus sin il pli tard dumengia saira.
