Il pli popular emprendissadi en il Grischun è quel da commerzi. 213 giuvenils han entschet il 2021 cun quest emprendissadi, mussan las cifras da l’Uffizi chantunal per furmaziun professiunala. Sin il segund plaz è l’emprendissadi sco spezialista u spezialist da sanadad. Sin il terz è il commerzi en detagl. Guardà sin l’entira Svizra èn era là quests emprendissadis sin ils top trais.
Nov dapi il 2017
In emprendissadi ch’i dat uschia pir dapi il 2017 e ch’è uss en il Grischun gia en ils top 10, è l’emprendissadi sco spezialista u spezialist da hotellaria e communicaziun.
175 da 258 pussaivladads
En il Grischun pon ils giuvenils tscherner tranter 175 differents emprendissadis, en l’entira Svizra datti 258 differents.
Raritads grischunas
Singuls emprendissadis pon ins persuenter quasi be far en il Grischun. Per exempel l’emprendissadi sco scrinari u scrinaria spezialisà sin far skis. U en la Val Müstair e en il Puschlav datti l’emprendissadi concepider da tessids. Là emprendan ils giuvenils da concepir e taisser taila. In’autra raritad è l’emprendissadi sco muliner ch’ins po era far en il Puschlav.