Siglir tar il cuntegn

Header

audio
Grischun fa pilot per testar anticorpuls
Or da Actualitad dals 20.10.2021.
abspielen. Laufzeit 2 minutas 8 Sekunden.
cuntegn

Emprova da pilot Guarì, e tuttina nagin certificat – Il Grischun vul midar quai

Persunas guaridas che na pon demussar nagin test duain obtegnair pli tgunsch in certificat da corona. La regenza grischuna ponderescha da far ina emprova da pilot.

Anticorpuls mussan, sch'ins ha gì corona

L'idea è quella: I dat glieud che ha trapassà la malsogna da corona, ma na sa nagut da quai u che n’ha fatg nagin test. Talas persunas duain pudair far in test dad anticorpul che vegn pajà. In tal test mussa, sch’ina persuna ha gì corona. Ina tala persuna guarida duai obtegnair ina vaccinaziun e lura survegnir in certificat.

Per persunas guaridas bastia ina solia vaccinaziun, per valair sco vaccinà cumplettamain, di la media chantunala Marina Jamnicki. Ils detagls da questa emprova da pilot en il Grischun na sajan anc betg definids dal tuttafatg. Cler saja però ch'il test dad anticorpuls saja gratuit per quellas persunas che sa laschian lura era vaccinar.

Tut, quai che gida dad augmentar la quota da vaccinads, è bun.
Autur: Peter Peyer cusseglier guvernativ GR

Il motiv per quest’emprova da pilot è dad augmentar la quota da vaccinads. Per il mument èn 67% da la populaziun grischuna vaccinada. I dovra anc intgins procents dapli per pudair smetter cun las mesiras cunter corona, di il minister da sanadad grischun Peter Peyer. Cunzunt tar persunas tranter 40 e 60 onns saja la quota da vaccinads anc memia bassa.

Medem certificat sco suenter vaccinaziun dubla

Pertutgant persunas guaridas ha era il cussegl federal mess en consultaziun ina proposta: Numnadamain che talas persunas duain obtegnair in certificat che vala 90 dis. L’idea grischuna sa differenziescha da questa proposta. Las persunas guaridas duain obtegnair cun ina vaccinaziun in certificat che vala tuttina ditg sco suenter ina vaccinaziun dubla.

RTR actualitad 17:00

Artitgels legids il pli savens

Scrollar a sanestra Scrollar a dretga