Siglir tar il cuntegn

Header

cuntegn

En consultaziun Dumondas che pertutgan il pievel viagiant e l'agid social

La regenza grischuna vul reparter eventuals agids socials per il pievel viagiant sin tut las vischnancas. Quai per ch’i na resultian nagins dischavantatgs per las regiuns cun ina plazza stabla. Perquai ha ella avert ina consultaziun per ina revisiun parziala da la lescha davart il sustegn da persunas basegnusas.

Plinavant è vegnida tramessa en consultaziun ina regulaziun davart la restituziun da prestaziuns d'agid social. Cun questa revisiun parziala duain vegnir pajads enavos daners socials retratgs, sche la situaziun finanziala sa mida considerablamain.

Revisiun concernent Svizras e Svizzers cun ina moda da viver nomada

I saja in giavisch da la regenza, che las Svizras ed ils Svizzers cun ina moda da viver nomada possian conservar lur tradiziun e cultura, scriva il chantun. Per il sustegn economic (agid social) è da princip quella vischnanca responsabla, en la quala las persunas basegnusas abitan u sa trategnan. Per Svizras e Svizzers cun moda da viver nomada è responsabla quella vischnanca, en la quala sa chatta la plazza da staziunament utilisada.

Per garantir ina purschida suffizienta da plazzas da staziunament duai vegnir introducida en la lescha ina nova regulaziun: Ils eventuals custs da l'agid social che resultan en connex cun ina plazza da staziunament per Svizras e Svizzers cun moda da viver nomada, vegnan repartids gist sin tut las vischnancas dal chantun. Uschia vul il chantun evitar dischavantatgs per vischnancas che mettan a disposiziun plazzas da staziunament per persunas che basegnan agid social.

Revisiun concernent la restituziun da prestaziuns d'agid social

Il Cussegl grond ha incumbensà la regenza en la sessiun d'october 2021 da preschentar ina missiva cun in sboz da la lescha per annullar l'obligaziun da restituir las prestaziuns d'agid social. Quai per persunas giuvnas creschidas durant l'emprima scolaziun. Ultra da quai duaia la regenza surlavurar la regulaziun vertenta concernent l'obligaziun da restituir las prestaziuns d'agid social per tut las persunas basegnusas.

Per realisar questa incumbensa ha il chantun elavurà ina proposta da regulaziun. Las directivas da la Conferenza svizra da l'agid social han servì per quest intent sco agid d'orientaziun.

Uschia duain prestaziuns da l'agid social ch'èn vegnidas retratgas, vegnir restituidas, sche las relaziuns d'entrada sa megliereschan considerablamain u sch'i resulta in augment da facultad. I dat dentant er excepziuns, numnadamain per persunas giuvnas creschidas che daventan basegnusas durant in'emprima scolaziun ed èn dependentas d'agid social. Era na duain per exempel prestaziuns da sustegn, che stattan en connex cun l'integraziun professiunala e sociala u cun in impediment, betg vegnir restituidas.

Ils documents pon ussa vegnir consultads

Las consultaziuns davart las duas revisiuns, ch'èn separadas tematicamain, han lieu a medem temp. La consultaziun dura dals 7 da december 2023 fin ils 6 da mars 2024. Ils documents respectivs pon vegnir consultads sin la pagina d'internet dal chantun Grischun.

RTR novitads 10:00

Artitgels legids il pli savens