Il chantun Grischun cumpra 0,5% da las aczias da la societad naziunala da la rait d'electricitad – quai per bunamain 10 milliuns francs. Tenor atgnas indicaziuns vul il chantun uschia auzar la muntada dal Grischun sco chantun da producziun d'electricitad cun aua. Da moda indirecta era il chantun gia ussa participà vid la Swissgrid. Quai cun sias participaziuns ad ovras idraulicas, ch'eran da lur vart participadas vid la Swissgrid. Da nov è il chantun ussa acziunari direct.
Represchentar ils interess dal Grischun
Per il Grischun saja quai ina participaziun da gronda muntada, communitgeschan il chantun. Cun questa participaziun directa possia il chantun represchentar ses interess en la radunanza generala da la Swissgrid. Quai saja en l'interess spezial dal Grischun cun bleras ovras da producziun e colliaziuns impurtantas da la rait da distribuziun naziunala. Ultra da quai saja quai era ina investiziun interessanta e lubeschia da diversifitgar il portfolio da participaziuns vid ovras idraulicas.
Tras in'offerta da las Ovras idraulicas dal Rain posteriur
Il 2013 avevan las Ovras idraulicas dal Rain posteriur (KHR) stuì surdar lur sectur da distribuziun a la Swissgrid pervi da la lescha per il provediment cun electricitad. Persuenter è la KHR daventada acziunaria da Swissgrid. Lasuenter ha la KHR offrì a ses acziunaris – tranter auters era il chantun Grischun – da surprender sias novas aczias da la Swissgrid.