Far l'enconuschientscha da la plattafurma d'emprender Moodle, in'introducziun en la biblioteca, ina visita d'ina interpresa ed era in eveniment da cuschinar ensemen èn tranter auter stads sin il program quest'emna per ils novs students da l'economia da manaschi. Davent da glindesdi fin gievgia han els gì program obligatoric e quai l'emna avant ch'il studi entschaiva lura vairamain ils 17 da settember. Ma era autras direcziuns da studi han gì in program pulpì.
Pertge uschè in grond program?
La Scola auta da tecnica ed economia a Cuira metta gronda paisa sin ils dis d'introducziun. Usità è tar las scolas autas ed universitads atgnamain in, dus dis da preparaziun per ils novs students. A Cuira datti, sco menziunà, per insaquantas direcziuns da studi schizunt in'emna da preparaziun. Martin Studer, prorectur da la HTW, è dentant persvadì che quell'emna fa bain als novs students ed è necessaria:
I dat simplamain chaussas ch'ins sto explitgar als novs students. Uschiglio – senz'emna d'introducziun – stuess tut quai vegnir fatg en l'emprima emna da studi ed ils docents avessan pli pauc temp d'instrucziun.
E sper las chaussas administrativas e las infurmaziuns da basa ch'èn necessarias, hai tar inqual direcziun da studi era gia dà eveniments che duajan mussar, nua ch'ins po in di lavurar cun quest studi u eveniments ord motivs socials, sco il cuschinar ensemen.
«L'occurrenza da Kick-Off»
In punct fix dal program da l'emna d'introducziun è stà la gievgia suentermezdi. Lura ha gì lieu in'occurrenza da sentupada per tut ils novs students da tut las direcziuns da studis. Igl è vegnì dividì ils students en gruppas ed els èn vegnids manads tras la citad veglia da Cuira. Cuira turissem ha infurmà là ils novs students davart l'istorgia da Cuira ed er organisaziuns da students èn sa preschentadas. A la fin da l'uschenumnà di da Kick-Off hai dà in apero en il Palazzo.
Reacziuns da students positivas
En general èn las reacziuns dals students stadas positivas. Schebain che inqual manegia ch'ins pudess reducir il program, èn ils blers stads cuntents cun la purschida. Cunzunt students ch'èn anc mai stads a Cuira, han gì gugent ch'il studi na cumenza betg directamain cun la materia, ch'ins haja anc peda da s'acclimatisar. L'emna d'introducziun saja uschia betg mo per l'introducziun en ils utensils da studi e per emprender ad enconuscher la scola d'avantatg, mabain er per vesair la citad e las fatschas che vegnan ad accumpagnar ils novs students ils proxims semesters.
RR actualitad 07:00