La scola da talents «Scoula Sportiva» a Champfèr en Engiadin’Ota po festivar quest onn il giubileum da 10 onns. Dapi in decenni pon talents or da las spartas sport e musica visitar questa scola enstagl da frequentar la scola superiura – talents cun ambiziuns da daventar in di profi da sport u in musicist professiunal.
Cumbinaziun da trenament e scola
A la scola sportiva a Champfèr survegnan las scolaras ed ils scolars sper ils roms da scola dapli temp per trenar e glimar vi da lur talents. Actualmain frequentan 31 scolaras e scolars la scola da talents en Engiadin’Ota. Impurtant per la scola saja ina buna collavuraziun cun las scolas communalas u la scola media, uschia il mainascola Andrea Vondrasek. Numnadamain dettia cas da scolaras u scolars che chalan cun il sport u la musica e ch'han lura da midar en la scola communala. Ubain giuvnas u giuvens che fan l’examen per la scola media e survegnan lura er là la pussaivladad da cumbinar sport u musica cun la scola. Sco concurrenza na vesa Andrea Vondrasek pia betg la scola sportiva a Champfèr.