Siglir tar il cuntegn

Header

cuntegn

Engiadina 10 onns Vereina – Cronologia dal tunnel dal Vereina

Il project dal tunnel dal Vereina ha gì ina lunga via enfin a la realisaziun. Las lavurs sezzas vi dal Vereina han cuzzà 8 onns. La fin november dal 1999 è il tunnel vegnì dà liber al traffic.

Lavurs vi dal plazzal dal tunnel dal Vereina.
Legenda: Pass per pass envers il tunnel. rail-info.ch

Lunga entschatta

Emprims plans concrets per bajegiar ina colliaziun tranter il Partenz e l'Engiadina Bassa existivan gia ils onns 70. 1984 è vegnì decidì da laschar crudar ils plans da renovar la via sur il Pass dal Flüela en favur d'in tunnel per transportar autos. Quella decisiun dal cussegl grond dal chantun Grischun è vegnida approvada cun gronda maioritad l'onn 1985 tar ina votaziun dal pievel. Suenter l'approvaziun dal project tras l'uffizi per traffic l'onn 1988 duri anc trais onns enfin l'emprima badigliada, quai pervi da dispitas pervi da projects e premissas da runcar. Ils 18 d'avrigl 1991 succeda alura l'emprima badigliada.

La construcziun

Stgavament al portal nord dal tunnel è succedida cun ina maschina da furar e dal sid cun la metoda classica da siglientar. La lingia dal Vereina cumenza al portal nord dal tunnel a Selfranga e finescha a Sagliains. Il Vereina è in tunnel cun binari simpel, entamez sa chatta ina guntgida da 2 kilometers per laschar cruschar trens. La perfuraziun è succedida ils 26 da mars 1997. Ils 10 da december 1998 èn ils binaris vegnids colliads dad omaduas varts. Suenter la cumplettaziun èn plirs tests vegnids fatgs cun trens. Quels han cuzzà enfin mez november 1999. Tar ina spertadad maximala da 100 km/h po il tren traversar tecnicamain il tunnel en 17 minutas. En l'urari vegn il temp da viadi calculà cun 19 minutas. Per ura e direcziun curseschan sin la lingia principala in enfin trais trens cun autos ed in tren da persunas.

Moritz Leuenberger (san.) e dr. Leon Schlumpf tar la festa uffiziala d'avertura.
Legenda: Moritz Leuenberger (san.) e dr. Leon Schlumpf tar la festa uffiziala d'avertura. rail-info.ch

Festa ed avertura

Ils 19 da november 1999 ha gì lieu l'act d'avertura entras represchentants da la politica e da la viafier. Il cussegl federal e schef dal departament federal per traffic, Moritz Leuenberger ha pudì surdar il tunnel al traffic. Suenter la festa uffiziala ha gì lieu durant dus dis ina festa populara per la populaziun. Glindesdi, ils 22 da november a las 05:45 è il tunnel vegnì dà liber per il traffic regular.

Artitgels legids il pli savens