3 giadas empruvà – 3 desditgas e 3 projects
Suenter avair candidà trais giadas haja finalmain funcziunà il 2020. Gabriella Binkert-Becchetti è daventada la presidenta communala da la Val Müstair per la perioda d’uffizi 2021 – 2024. Trais persunas han desditg lur plazzas dapi ch’ella è al timun, tenor ella segir causa sia persuna ma era causa la nova suprastanza communala.
Sin maisa stattan trais grondas pendenzas, la realisaziun da la chamona SAC Alp Sprella, la pendiculara Minschuns cun il project La Sassa e la finala il sviament da Sta. Maria. Tar tuts trais stattan avant anc bleras sesidas cun instituziuns chantunalas e da la protecziun da la natira. Il project il pli realisabel ils proxims onns è tenor la nova presidenta, il sviament. Ma tar tut ils projects vegnia a durar anc onns enfin la realisaziun.
Il pli grond midament è stà da surdar il scepter a chasa
Tras si’experienza en la cumissiun da gestiun, haja Nora Saratz Cazin gia gì in’idea tge che spetgia ella en ses nov uffizi. Per la dunna da 39 onns e mamma da trais uffants saja stà il pli grond midament da surdar la responsabladad a chasa a ses um. Il pensum da la presidenta communala da Puntraschigna è numnadamain dotà cun 90%. Nora Saratz Cazin s’engascha per rinforzar la vita en la vischnanca e ch’i dat en il futur puspè dapli emprimas abitaziuns per indigens.
Ins è 24 uras a di president da Samedan
Era sch’il pensum per il presidi da la vischnanca è tar 50% bada Gian Peter Niggli ch’el na vegn mai da separar tranter uffizi politic e professiun sco pur d’allevament.
Sco emprim pass ha il deputà da la PLD allontanà bler palpiri ord ses biro. Il Samedrin da 62 onns metta pais sin meds digitals per lavurar. In eventual sbassament dal pe da taglia a Samedan, saja be in dals puncts centrals che vegnian tractads davos las culissas.
In sigl en l’aua fraida
A Segl ha num la nova presidenta communala Barbara Aeschbacher. Per ella è il cumenzament dal nov uffizi stà in sigl en l’aua fraida. Quai perquai ch’ella na saja mai stada en in gremi politic. Tras quai manchia la savida fundada. La dunna ch’abita en la Val Fex è perquai cuntenta d’avair ina suprastanza cun experientscha davos ella. Sper diversas pendenzas communalas, sco il project d’ina nova plazza da sport u il spustament dal lavuratori communal or dal center, stat er la pendenza da l'emprender rumantsch sin il pult da Barbara Aeschbacher.