La litteratura rumantscha è vasta, emplaina curunas e curunas ed è vegnida e vegn scritta da blers e bleras. Tuttina datti per Rico Valär ina scuverta – ses tip litterar per la festa da la Lia Rumantscha: «La renaschentscha dals patagons» da Reto Caratsch.
In text linguisticamain betg simpel, ma in per pischar en chautschas dal plaschair.
Il professer da cultura e litteratura rumantscha a l'Universitad da Turitg ha dentant anc dapli tips. Or da ses punct da vista sto mintga Sursilvan avair legì ina giada en sia vita «La Lufa» e mincha Engiadinais almain in crimi da «Nuot Nes».
Cun metter ensemen ses referat haja el constatà puspè ina giada, che la litteratura saja il lieu, nua che nus duvrain la lingua en moda creativa e divertenta. Nua ch'i vegn scrit da realitads rumantschas ma era da munds fantastics.
La litteratura è ina moda da documentar nossa cultura, da'ns dar ina identitad e da procurar per discussiuns. Ella dat ina substanza a nossa lingua rumantscha.
Rico Valär na fa dentant betg mo il sguard enavos sin ils davos 500 onns, mabain era quel enavant. E qua vesa el surtut in grond plazzal: la furmaziun.
E qua sajan dumandads uschebain il chantun Grischun, ch'è responsabel per la furmaziun en las scolas, ma era la Lia Rumantscha, che saja responsabla per la furmaziun informala.
RR live da Zuoz 12:00