Siglir tar il cuntegn

Header

audio
Bunura: Agrischa 2019 – Attracziuns e tradiziuns
Or da Actualitad dals 10.04.2019.
abspielen. Laufzeit 03:15 Minuten.
cuntegn

Engiadina 10avla Agrischa sa ferma a Zernez

L’ediziun da giubileum da l’exposiziun agricula grischuna vegn festivada quest onn en Engiadina. L’eveniment sur dus dis duai esser en emprima lingia in lieu d’inscunter.

Il fil cotschen da la Agrischa 2019 è la varietad da l’agricultura grischuna e la tradiziun che vegn per part anc vivida oz. Cunquai ch’i sa tracta da la segunda giada che l’exposiziun agricula grischuna ha lieu a Zernez, haja il comité d’organisaziun er pudì profitar da las experientschas ch’ins aveva fatg il 2014.

Sustegn da tut las sis vals

Part dal Grischun dal Sid fan sper l’Engiadin’Ota e l’Engiadina Bassa er Samignun, la Val Müstair e las duas valladas talianas Bregaglia e Puschlav. Cuntanschì il numer da 580 voluntaris hajan ins dentant er cun sustegn da differentas societads da la val, ha precisà il president dal comité d’organisaziun, Gian Peter Niggli.

Il comité d'organisaziun da l'Agrischa.
Legenda: Il comité d'organisaziun da l'Agrischa (da san): Fadri Riatsch, Tamara Casutt, Gian Peter Niggli (president), Duosch Städler, Fadri Stricker. RTR, Anna Caprez

Bellezza e buntads

Sper las concurrenzas tradiziunalas da bellezza tranter las differentas razzas da vatgas, bescha e chavals vegn er mess gronda paisa sin la preschentaziun dals products ord l’agricultura. Surtut duain ils visitaders avair in'invista en l’elavuraziun e producziun da mangiativas e products regiunals.

Scumetter sin in ansiel

Nov duai attrair l’attenziun ina concurrenza speziala, nua ch’ins po scumetter raps sin il talent dad ansiels. Quels han da rampignar sin ina tur da strom uschè svelt co pussibel. Ultra da quai pon famiglias sa participar a l’olimpiada sin l’areal da l’Agrischa a Zernez.

La Agrischa ha lieu mintg’onn en ina da las 5 regiuns en Grischun. Quest onn è la 10avla ediziun en Engiadina, ils 27 e 28 d’avrigl 2019 a Zernez. RTR vegn er ad esser preschent al lieu.

RR novitads 17:00