Siglir tar il cuntegn
cuntegn

Engiadina 110 banchiers da tut il mund a Puntraschigna

Per l'emprima giada ha Peter Fanconi, president da la BlueOrchard Finance SA e da la Banca Chantunala Grischuna organisà l'inscunter a Puntraschigna. La finamira è stada da porscher ina plattafurma da discussiun e colliaziun per banchiers da l'entir mund.

Legenda: Tadlar il audio Radund 110 banchiers han s'inscuntrads a Puntraschigna. Durada 02:55 minutas.
02:55 min, Actualitad dals 04.10.2018.

Els èn viagiads a Puntraschigna dals Stadis Unids, il Giapun, la China, l'Armenia u da differents pajais da l'Europa. CEOs, presidents da cussegls d'administraziun ni autras persunalitads pussantas dal mund da finanzas.

Durant ils dus dis dal congress han els discutà co cumbatter la paupradad ed ils effects dal midament dal clima en pajais dal Terz Mund.

Basegn d'investir è qua

Che radund 110 persunas èn vegnidas a l'inscunter mussia per Peter Fanconi ch'i dettia in basegn d'investir en pajais dal Terz Mund. Blers na sappian dentant betg co e nua ch'els possian far quai.

L'inscunter duess perquai porscher als banchiers la pussaivladad da discutar e sa colliar e lura manar a novas investiziuns.

Agid per l'agid a sasez

La BlueOrchard Finance SA è vegnida fundada sin iniziativa da Kofi Annan durant ses temp sco secretari general da las Naziuns Unidas. La finamira è da cumbatter la paupradad en pajais dal Terz Mund cun dar micro-credits. La finamira è damai da porscher agid per l'agid a sasez.

RR actualitad 07:00