La BPM Sports GmbH, ch'ha fatg il studi sin incumbensa da la conferenza da presidents da la Regiun Malögia, ha evaluà ils areals proponids da las vischnancas sin basa da criteris sco la grondezza da l'areal, l'accessibladad cun il traffic public e pussaivels ristgs.
Facturs sco leschas u zonas n'èn betg vegnids resguardads. Tenor ils responsabels saja quai stà pli impurtant dad evaluar l'emprim ils areals en la dumonda da la realisabladad per gia pudair excluder l'in u l'auter areal.
13 areals en cursa
En tut prenda il studi sut la marella 13 areals a S-chanf, Zuoz, Samedan, Schlarigna, San Murezzan e Bregaglia. En tut ils lieus fiss quai pussaivel da realisar ina halla da glatsch «basic». Quai vul dir ina halla simpla tenor l'exempel da quella da Grüsch.
Il studi ha dentant era evaluà ina halla «plus» cun dapli gardarobas, che fiss buna dad ospitar champs da trenament e turniers sco er las opziuns d'ina halla da curling ed ina plazza da glatsch externa.
Propostas dal studi
Il studi propona che la halla duai vegnir fabritgada en in lieu central ch'è bain accessibel cun il traffic public. El propona dentant era da considerar in implant pli grond e cumplet en favur da plirs implants pitschens en diversas vischnancas. In implant pli grond saja pli simpel da manar economicamain che plirs implants pitschens, betg utilisads bain.
Nagina decisiun avant la decisiun
Las vischnancas han uss temp enfin il 5 d'october da prender posiziun envers il studi da realisabladad da la halla da glatsch regiunala da l'Engiadin'Ota. Tgenins dals lieus proponids che vegnan lura persequitads vegn decidì pir suenter la votaziun dals 10 da favrer 2019. Lura sto il suveran da la Regiun Malögia numnadamain decider, sch'el vul propi la halla da glatsch u betg.
Tar in GEA vegni sco emprim a dar ina shortlist da dus fin trais lieus che vegnan lura examinads pli profundamain, è vegnì infurmà a la conferenza da presidents da la Regiun Malögia. E lura ston era la finanziaziun ed ils purtaders vegnir definids ed i sto dar ina planisaziun co la halla duai vegnir gestiunada.
RR actualitad 17:00