Era l’Engiadina Bassa ha fatg in viadi vers il tradiziunal Tattoo a Basilea. Abitantas ed abitants han profità dad ina purschida dad ir cul bus per visitar quest event. E nus avain accumpagnà els.
Prominenza internaziunala
Las aspectativas eran grondas ed ellas èn era vegnidas accumplidas. Cun musica da recruts da la Norvegia, ina musica ordvart agila e divertenta da l’India, ma era bands da l’Engalterra e da l'America èn stadas preschentas. Fascinà han las choreografias e la precisiun enorma da la United States Air Force Honor Guard, cun lur schluppets.
Per in ambient spezial han procurà il chantadur e musicist Cameron Barnes da la Scozia e la gruppa enconuschenta Red Hot Chilli Pipers.
La pel-gaglina fan ils Red Hot Chilli Pipers, quai èn mes favorits.
Er ils Svizzers n'han betg mancà
Ma i na dat nagin Basilea Tattoo senza la preschientscha Svizra, la «Swiss Army Central Band» e natiralmain «Top Secret» cun lur tamburs han procurà per muments musicals che han fatg vegnir la pel-giaglina.
Malgrà las chaliras han ils radund 25 Engiadinais ed Engiadinaisas fatg il lung viadi en la citad da Basilea, giudì l’event e natiralmain era la bella saira en cumpagnia.