Survegnir ina diagnosa d’ina greva malsogna è in schoc per pertutgads ma er per lur confamigliars e lur conturn. La vita vegn messa d’in mument sin l’auter cumplettamain sin il chau. Per vegnir tras quest temp difficil porschan differentas instituziuns agid. En Engiadina e las vals dal sid è vegnida fundada avant 20 onns la societad AVEGNIR.
Discurs e cussegliaziuns
Duas cussegliadras s’engaschan actualmain per la societad e lavuran tenor basegn. Ellas sajan scoladas sin il sectur da la psico-oncologia, di Franzisca Giovanoli, suprastanta da la societad AVEGNIR. La societad sezza vegnia finanziada cumplainamain da donaziuns e commembranza.
Nagina festa pompusa
Per il 20avel giubileum hajan ins decis da desister d'ina gronda festa. Quai a favur da las finanzas e la lavur preziusa per la regiun, uschia Franzisca Giovanoli. Per il futur da la societad AVEGNIR giavischa ella da pudair cuntinuar cun il sustegn e l'engaschament sco enfin oz.