Siglir tar il cuntegn

Header

cuntegn

20 onns Vereina Benedicziun vs. smaladicziun

Ils 19 da november 1999. Suenter radund 8 onns construcziun e custs da circa 800 milliun francs è l’Engiadina vegnida per radund 40 kilometers pli datiers al rest da la Svizra.

Per la Viafier retica è oz in grond di da festa. Ella dastga numnadamain festivar il 20avel anniversari dal tunnel dal Vereina.

Sco istorgia da success e project da tschientaner vegn il Vereina tranter auter titulà. Sper ina colliaziun pli sperta en l’Engiadina ha il Vereina dentant era chaschunà blera critica en val. Oravant tut la via rudlanta è vegnida cumbattida ferventamain. In dals adversaris ils pli gronds, Jacques Guidon. Sias temas entras la lavina d'autos:

  • La perdita da la cultura rumantscha en Engiadina
  • In augment massiv dal turissem da massa
  • Ina scufla da speculaziun entras pretschs pli auts da terren da construcziun

Era 20 onns pli tard è el persvas che lur temas eran verifitgadas.

Video
Jacques Guidon vesa confermà ses quitads pervi dal Vereina
Or da Telesguard dals 19.11.2019.
laschar ir

Sche la fora ha propi fatg donn a l’Engiadina è difficil da dir, precis sco la dumonda, tge svilup ch'igl avess dà senza il tunnel. Fatg è dentant, ch’il Vereina ha segiramain promovì la mobilitad. Uschia è creschida la cifra dals vehichels che traversan il tunnel, dapi il cumenzament da 300’000 sin passa 500’000 vehichels l’onn.

Discussiuns er anc oz

Video
Duri Bezzola e Cla Sarott davart il profit per lEngiadina grazia...
Or da RTR dals 19.11.2019.
laschar ir

Las discussiuns per ubain cunter il tunnel dal Vereina èn stadas grondas gia avant la construcziun. Ma er uss datti anc promoturs ed er adversaris dal tunnel. In dals promoturs è l'anteriur cusseglier naziunal Duri Bezzola. Tenor el ha l'Engiadina profità ferm dal Vereina.

In adversari fervent, betg dal tunnel, ma da la via rudlanta, è stà Cla Sarott, anteriur president communal da Sent e fundatur e president da l'acziun «Flüela nossa via – Engiadina Bassa Val Müstair».

Festa a Lavin, Sagliains e Claustra

Per festivar il giubilar organisescha la Viafier retica ina gronda festa che ha lieu quest mardi saira a Lavin, Sagliains e Claustra. RTR è live da la partida.

Video
Discurs cun Emil Müller, Simon Rohner e Stefan Engler live or dal tren da festa
Or da Telesguard dals 19.11.2019.
laschar ir

RR actualitad 07:00