Il tunnel Munt La Schera che collia l'Engiadina Bassa cun Livigno dovra ina ulteriura sanaziun. Quai suenter ch'el è gia vegnì sanà ils ultims dus onns per 17 milliuns francs. Igl è vegnì realisà oravant tut lavurs vid l'arvieut dal tunnel quai per reducir il privel da crappa e furmaziun da glatsch. Ultra da quai èn era vegnì fatg lavurs per meglierar la segirezza, sco per exempel l'illuminaziun dal tunnel e la surveglianza da video.
Avert la stad durant il di – serrà l'atun
Sco quai che las Ovras electricas d'Engiadina communitgeschan, hajan ins durant questas lavur constatà ch'i dovria ulteriuras sanaziuns. Las ovras fan perquai quint cun ulteriurs custs da 8,5 milliuns francs. En consequenza sto il tunnel er vegnì serrà ils proxims dus onns, ils mais da stad duai quel però restar avert durant il di. L'atun sto el dentant vegnir serrà per tut il traffic.
