Quest onn porschan ils organisaturs dal Concours Hippique a Zuoz per l’emprima giada ina plazza da sablun per lur concurrenza. Quella ha procurà per in record da participantas e participants.
234 stanzas singulas - ina sfida per l'hotelier
Uschia vegni a dar questa fin d’emna passa 1’000 partenzas en diversas concurrenzas da sigl. Las dimensiuns novas èn era ina sfida per Andri Marugg, il schef da stalla durant il Concours.
Cun ses gidanters ha el construì quatter tendas da stalla cun in total da 234 cumpartiments singuls, uschenumnadas boxas per chavals.
In hotel da luxus per atlets da luxus. Ils chavals da sigl custan en media 50 enfin 60’000 francs, uschia Andri Marugg en discurs cun la reportra Anna Caprez. Perquai datti era in servetsch da segirtad, che protegia chavals ed equipament durant las notgs da l'eveniment da tradiziun che ha lieu quest onn per la 47avla giada.
Servetsch da pedicure durant trais dis
Era en acziun durant ils trais da Concours Hippique a Zuoz e il ferrer Curdin Joos. El è preschent sin plazza cun sia fuschina mobila per procurar entaifer pauc temp novs fiers-chaval, novas stgarpas per ils animals prezius.
Roman Thöny l'ultima giada al timun
Cun la 47avla ediziun dal Concours Hippique va er a fin il temp d'uffizi dal president dal comitè d'organisaziun, Roman Thöny. Suenter 12 onns en carica ha el demissiunà il presidi per la fin da quest onn.
