Donna Leon è vegnida nà da la Val Müstair a Segl per sia prelecziun da mardi saira al festival Resonanzen en i'hotel Waldhaus. L'autura americana che viva dapi 35 onns a Venezia viva dentant parzialmain era en Val Müstair. A Segl ha ella prelegì per il giubileum da 25 onns e 25 cas da ses famus commissario Brunetti.
Brunetti è naschì grazia a l'opera
L'emprim cas da commissario Brunetti è d'engraziar a la passiun da Donna Leon per l'opera: Durant ina visita a l'opera «La Fenice» a Venezia ha ditg la persuna che accumpagnava Donna Leon ch'el stranglass il pli gugent il dirigent. «Jau fatsch quai per tai, ma en in roman» ha ditg Donna Leon sin quai. Il resultat è stà l'emprim cas da commissario Brunetti «Death at La Fenice» (Venezianisches Finale). Ussa è cumparì il 25avel cas da Brunetti «The Waters of Eternal Youth» (Ewige Jugend).
La pasch da la natira
Donna Leon ha tradì durant la prelecziun a Segl ch'ella na possia strusch pli viver a Venezia. Là haja massas da turists ed er adina dapli fabricats e stizuns che na plaschian betg ad ella. Perquai viva ella durant radund 5 mais l'onn en Val Müstair. Ella amia questa cuntrada alpina che resplendia la pasch da la natira, ha ditg Donna Leon a Radiotelevisiun Svizra Rumantscha RTR. Ella saja stada commuventada cura ch'ella haja vesì la stgargiada d'alp a Santa Maria en Val Müstair sonda passada.
RR actualitad 08:00