Il chant tradiziunal da jodlar è arrivà en Engiadina tras l’hotelier Wilfried Marti. El aveva organisà in magister da jodlar per persunas interessadas. Da quest curs è resultada la fundaziun da la societad «Oberengadiner Jodelchörli», ils 28 da settember 1988, da quella giada cun 22 commembers.
Cifras constantas
Oz sa preschenta la societad cun 27 jodladras e jodladers. Grond plaschair ha la co-presidenta da la societad, Johanna Schnitzler, da la commembranza da duas novas vuschs giuvnas. Main allegraivla saja la situaziun areguard vuschs virilas, sco en blers chors manchian ils umens.
Pregiudizi e tradiziun
Johanna Schnitzler da Schlarigna è dapi il 2007 da la partida. L’Engiadinaisa auda anc oz qua e là remartgas e piztgadas davart il chant da jodel en connex cun l’Engiadina. Il pli tard suenter avair udì il chant dals jodladers sa midia il maletg dentant. La finala sa tractia simplamain d’ina chaussa dal cor.
Variaziuns da costums
Cunquai che la gronda part dals commembers deriva d'auters chantuns en Svizra, è er la varietad dals costums dals jodladers e las jodladras durant lur concerts gronda. Mintgin portia il vestgì da ses agen chantun.
En occasiun dal giubileum dat il chor in concert ils 25 da settember 2018 a las 19:00 en la Baselgia refurmada a Malögia.
RR actualitad 11:30