4.5 milliuns per il territori da skis en Val Müstair?

La radunanza communala decida davart la vendita da terren per in nov resort da vacanzas e davart credits per il territori da skis Minschuns.

Laschar ir video «Val Müstair sto decider davart grondas investiziuns»

Val Müstair sto decider davart grondas investiziuns

4:14 min, Telesguard dals 2.11.2016

Tractandas impurtantas a la radunanza communala en Val Müstair mesemna saira: La vendita da terren per 1.7 milliuns francs a la Domenig Immobilien SA per pussibilitar la fabrica dad in resort da vacanzas cun 250 letgs. Plinavant 2 credits ed ina garanzia per in credit en la dimensiun da 4.4 milliuns francs per il territori da skis Minschuns. La Minschuns SA duai uschia pudair fabritgar ina telecabina da Tschierv si en il territori da skis e realisar indrizs per ennavar tecnicamain.

Senza telecabina nagin resort

L'investur per il resort da vacanzas «La Sassa», la Domenig Immobilien SA ha mess la cundiziun ch'il resort da vacanzas vegnia be realisà sche la telecabina vegn era fabritgada. Perquai vul la vischnanca ussa investir ils 1.7 milliuns francs che resultan da la vendita da terren per Minschuns.

En pli duai la vischnanca anc dar in credit à «fonds perdu» dad 1.3 milliuns a Minschuns. E la vischnanca duai sco terz punct dar ina garanzia per in credit dad 1.4 milliuns francs che Minschuns survegniss da l'uffizi d'economia e turissem grischun.

Ils 4.4 milliuns francs fissan la basa per finanziar la telecabina ed ils indrizs per ennavar a Minschuns. La radunanza communala decida davart ils credits e davart il contract da vendita dal terren da fabrica

Resort per 25 milliuns francs cun 250 letgs

L'investur Domenig Immobilien SA vul construir in vitg da vacanzas cun en ina prima etappa radund 60 abitaziuns u 250 letgs. Las abitaziuns fissan abitaziuns plitost luxuriusas en il segment da 4 stailas. Ins quinta cun custs da radund 25 milliuns francs per construir il resort «La Sassa».

Opposiziun

Sch'il ristg finanzial è supportabel per la vischnanca è ussa la dumonda decisiva. L'uffizi da vischnancas grischun scriva en in rapport davart la situaziun finanziala da la Val Müstair che la situaziun finanziala na saja betg confortabla. Il ristg finanzial per la vischnanca pudess esser memia grond surtut sche las investiziuns na portan betg il success giavischà per il territori da skis Minschuns.

Sche Minschuns n'arrivass betg da gestiunar il territori da skis cun success en avegnir pudess la situaziun finanziala da la vischnanca daventar critica, cun quai che ella stuess lura purtar tut il pais finanzial da las investiziuns da 4.4 milliuns francs. Uschia datti era vuschs criticas avant la radunanza communala che dian ch'il ristg finanzial per la vischnanca saja memia grond.

RR actualitad 12:00