Siglir tar il cuntegn

Engiadina 4 sugas, 88 tonnas, 3 emnas lavur

Igl e la penultim'etappa da las lavurs vid la nova pendiculara Albigna en Val Bregaglia. Ed igl è quella che pretenda bler dals lavurers e da la tecnica. Per montar las quatter sugas purtantas da la pendiculara dovri numnadamain in sistem ch'è unic ed anc mai vegnì duvrà en Svizra.

I sa tracta da maschinas spezialas per trair e franar las sugas che paisan mintgina 22 tonnas. Senz'il sistem en la staziun a val a Pranzaira crudass la suga en la bostga e crappa. La differenza d'autezza tranter la staziun a val a quella da muntogna è numnadamain fitg gronda cun 900 meters.

En tut ha la pendiculara da las ovras electricas da Turitg EWZ ina lunghezza da 2,4 kilometers.

Las sugas en detagl

  • mintgina paisa 22 tonnas,
  • è 2'700 meters lunga
  • ed ha in diameter da 4 centimeters

Per montar ina suletta suga dovri 3 uras e tut en tut dovra la firma spezialisada Garaventa ensemen cun ils lavurers da las ovras electricas da Turitg EWZ 3 emnas per montar las 4 sugas.

Gronda lavur è fatga

Suenter che las sugas èn montadas a fin vai en la fasa finala ed uschia en la davos'etappa da lavur avant l'avertura da la nova pendiculara. Las installaziuns tecnicas stoppian lura anc vegnir fatgas, ed er lavurs pitschnas sco far urden èsi da far.

Avertura mez fanadur

La pendiculara che ha custà 15 milliuns francs stat puspè a disposiziun per transports da material e persunas a partir da mez fanadur. La premissa è ch'èr la davos'etappa va sco planisada.