L’idea da pudair offrir gieus da cumpagnia a famiglias u ad uffants en situaziuns finanzialmain difficilas, saja anc oz la finamira centrala da la Ludoteca a Samedan, uschia Luzi Oberer, in dals voluntaris.
Il gieu è anc adina qua per vegnir ensemen, giugar, gudagnar e per la cuminanza.
La purschida da gieus e giugarets vegnia adina puspè actualisada e cuntegna insatge per giuven e vegl. Dumandà sajan anc adina figuras da Playmobil, ma er costums e gieus auditivs. Quels na datti dentant betg pli en furma da cassetta, ma sco figuras ch’ins po tadlar cun ils meds d’ozendi.
Dapli spierta, dapli lavur
La gronda spierta muntia er dapli lavur per las voluntarias ed ils voluntaris che s’engaschan per la Ludoteca. Actualmain lavuran 12 voluntaris duas fin trais giadas il mais en la Ludoteca a Samedan. La societad Ludoteca vegn sustegnida da vischnancas da l’Engiadin’Ota e da differentas interpresas privatas.
En occasiun dal giubileum da 40 onns organisescha la societad da la Ludoteca in suentermezdi cun gieus e divertiment per grond e pitschen.
