Siglir tar il cuntegn

Header

Video
La Biosfera Val Müstair puspè senza directur
Or da Telesguard dals 22.11.2016.
abspielen
cuntegn

Engiadina 5 avant las 12 per la Biosfera Val Müstair?

Suenter la demissiun dal directur Ulf Zimmermann avertescha il president communal Arno Lamprecht, che la situaziun per il parc da natira en Val Müstair saja critica. Il chantun vul analisar la situaziun difficila.

Il directur partent da la Biosfera Val Müstair Ulf Zimmermann sez n'ha betg vulì prender posiziun davart sia demissiun. El ed il president da la cumissiun strategica da la Biosfera e president communal Arno Lamprecht han decidì, che unicamain Arno Lamprecht declera la situaziun.

Nagin sustegn

Zimmermann haja fatg lavur fitg professiunala ha ditg Lamprecht envers Radiotelevisiun Svizra Rumantscha RTR. El n'haja dentant betg gì il sustegn necessari en Val Müstair per cuntanscher las finamiras definidas per ils projects da la Biosfera.

Uschia na possian ins betg lavurar. La Biosfera saja liada a las finamiras ed ils projects definids. Ins na possia betg simplamain uschia ir per raps tar la Biosfera. Quai èn tenor Lamprecht puncts ch'han manà ad ina situaziun da lavur difficila per il directur da la Biosfera.

Avegnir malsegir - partan anc auters collavuraturs?

Arno Lamprecht vesa uss in avegnir intschert per la Biosfera Val Müstair. El tema, che anc plirs collavuraturs da la Biosfera pudessan desdir lur plazzas da lavur. E Lamprecht è surtut da l'avis, ch'ins trametta ussa in nausch signal envers la regiun, il chantun Grischun e la Confederaziun.

Che trais directurs qualifitgads bandunan la Biosfera aifer curt temp saja problematic. Uschia vesa il president communal il privel, ch'i na vegn betg pli a dar sustegn da Confederaziun e chantun per la Biosfera, sch'il manaschi na funcziuna betg. E senza Biosfera saja l'avegnir da l'entira Val Müstair malsegir.

Plirs projects en Val na fissan «betg realistics» senza Biosfera

Arno Lamprecht mussa vi sin il fatg ch'era projects sco il ressort da vacanzas planisà a Tschierv sco era il project da svilup regiunal per ina chascharia, ina chasa da maz ed in local per elavurar graun sajan projects cun la Biosfera sco partenari. Senza ina Biosfera che funcziuna na sajan quests projects era betg realistics.

Il chantun pudess trair il frain

Andreas Cabalzar da l'Uffizi per la natira e l'ambient dal chantun Grischun vul ussa analisar ensemen cun la vischnanca Val Müstair e cun la Biosfera Val Müstair tge che na funcziuna betg. Per il chantun èsi cler che la Biosfera sto lavurar vinavant per la perioda da gestiun da 10 onns che dura anc fin l'onn 2020. Dentant savessi esser che il chantun adatta ils pajaments annuals sch'ins vesa che la Biosfera na po betg ademplir las finamiras fixadas ensemen cun il chantun e la Confederaziun.