Siglir tar il cuntegn
Inhalt

Engiadina 50 onns Chesa da Giarsuns

Blers onns è l’occupaziun da la chasa d'emprendists a Samedan stada fitg buna, senza far reclama. Oz è la concurrenza pli gronda e cun la demografia datti adina pli paucs emprendists.

Legende: Video 50 onns Chesa da Giarsuns a Samedan abspielen. Laufzeit 03:47 Minuten.
Or da Telesguard dals 07.09.2018.

Ditg è la Chesa da Giarsuns stada l’unic lieu da star per emprendists da l’Engiadina Bassa, la Val Müstair, il Puschlav u la Bregaglia. Oz datti spazi d’abitar pajabel era per giuvens ubain ina chasa che porscha abitaziuns per giuvens fin 25 onns. Quai bada la chasa d'emprendists. L’onn 2017 è per exempel stà il pli nausch onn da gestiun cun in'occupaziun da mo 85%.

Modernisar la spierta

Per il manader da la chasa, Armin Heim, è quai ina realitad ch’i dovra oz dapli sforz per emplenir la chasa. Uschia hajan els modernisà la pagina d’internet, stampà flyers, giajan a messas per giarsuns u tschertgian la collavuraziun cun scolas e patruns. Che la spierta saja ord la moda na craja el dentant betg.

Nus essan persvas che nossa spierta è era oz anc attractiva, malgrà las reglas che valan tar nus.
Autur: Armin HeimManader da la chasa d'emprendists

Ils emprendists e las emprendistas che stattan durant lur emprendissadi en la chasa d'emprendists sa decidan or da divers motivs per quai. Els han pensiun cumplaina per in pretsch favuraivel, na ston damai betg cuschinar, han adina cumpagnia ed èn ensemen cun giuvens da la medema vegliadetgna. Quai stiman tuts, era Flavia Salvett da Santa Maria e Riet Scandella da Müstair sco els han raquintà ad RTR. Senza la chasa d'emprendists n'avessan els forsa betg decidì da far l’emprendissadi en Engiadin’Ota.

Innovaziuns per l’avegnir

Per l’avegnir èsi per Armin Heim cler che la chasa sto vegnir renovada. In emprim mez milliun francs ha la fundaziun investì questa stad en la modernisaziun da la sala da mangiar ed en las stanzas da star da cumpagnia. En avegnir duain las stanzas da durmir vegnir modernisadas. Ideas èn sin maisa, ston dentant anc vegnir concretisadas, uschia il manader da la chasa.

Telesguard 17:40