Siglir tar il cuntegn
Inhalt

Engiadina 50 onns Maraton da skis engiadinais – in motiv per festivar

Da 945 sin passa 13’000 curridurs, quai è il success dal Maraton da skis engiadinais. Il 2018 ha lieu la 50avla ediziun dal maraton. Quel vegn accumpagnà d'attracziuns, festas ed exposiziuns.

Aur sin nair, quai en occasiun dal 50avel onn da giubileum dal maraton da skis engiadinais
Legenda: Aur sin nair, quai en occasiun dal 50avel onn da giubileum dal maraton da skis engiadinais RTR, Anna Caprez

Il nov mainagestiun/CEO Menduri Kasper dal Maraton da skis engiadinais è cunter ina festa singula, quest giubileum duess restar en buna memoria. Previs èn differentas attracziuns ed exposiziuns sco per exempel l’adattaziun da la colur dal logo, per l’onn da giubileum vegn quel ad esser colur d’aur sin nair.

En la «Design Gallery» che sa chatta en il parcadi da San Murezzan vegnan exposts 31 maletgs, en il Museum alpin a Puntraschigna vegn ad avair lieu in'exposiziun da skis, medaglias, fotografias, films e numers da las differentas epocas. Sur tut l'onn è planisà in program da giubileum varià. E natiralmain datti anc durant l’emna da la cursa diversas attracziuns spezialas per ils curridurs ed aspectaturs.

Il comité d’organisaziun prevesa d’investir radund 150’000 francs per las festivitads da giubileum. Per il maraton sez èn previs custs en il rom dals onns anteriurs – numnadamain da radund 3 milliuns francs.