Siglir tar il cuntegn
cuntegn

Engiadina 50 onns Scola da musica Engiadin’Ota

Per promover la vita musicala en Engiadin’Ota avevan Hannes Reimann, Albert Scheuing, Louis Häfliger ed il reverenda Wolfgang Hammer fundà ils 23 da matg 1968 la societad «Musikkollegium Oberengadin». Entant quinta la scola passa 620 scolars.

Sper plirs eveniments sco in di da musica a scola, represchentaziuns da ballet e concertins durant tut l’onn da giubileum, fan er part trais arranschaments principals al program. Cun in concert da giubileum ils 24 da favrer 2018 cumenza la Scola da musica d’Engiadin’Ota ses program da giubileum.

Grond’acceptanza

Co il vicepresident da la scola Schimun Caratsch ha declerà ad RTR, giaudia quella ina fitg bun’acceptanza en Engiadin’Ota. Quai haja per exempel demussà il cler resultat da votaziun dal 2008, cura che passa 80% da la populaziun aveva ditg gea a la dumonda sche la scola duai daventar ina lezia dal Circul regiunal. Entant è il circul abolì e dapi quest onn la nova Regiun Malögia en vigur.

Finanziaziun pli difficila

Per la Scola da musica Engiadin’Ota signifitga quel midament dapli lavur birocratica ed ina tscherta malsegirtad, ha agiuntà Caratsch. Nov ha la scola numnadamain dad ir a tractar cun mintga singula vischnanca ina cunvegna da prestaziun. Quella vala mintgamai quatter onns.

Cun quest nov model dettia er damain raps ord la regiun, uschia che la scola haja dad ir sur ils cudeschs a reguard la finanziaziun da l’organisaziun, ha ditg Schimun Caratsch. La Scola da musica Engiadin'Ota ha actualmain bun 25 magisters che instrueschan radund 620 scolaras e scolars.

Ord l'archiv da RTR

Legenda: Guardar il video 40 onns scola da musica. Durada 02:30 minutas.
Or da RTR dals 18.09.2008.

RR actualitad 12:00