La radunanza communala da Zuoz ha ditg cleramain gea a la fundaziun da la nova societad d'aczias «Engiadina San Murezzan Turissem». Quella duai remplazzar la destinaziun actuala da l'Engiadin'Ota a partir dal 2018.
Novas structuras
Quai è necessari perquai ch'il circul sco organisaziun purtadra per la destinaziun, n'exista alura betg pli. Sche la nova societad d'aczias daventa realitad sto Zuoz pajar 10% damain per las prestaziuns da basa, numnadamain radund 620'000 francs empè dad oz radund 690'000 francs. Quai pertge che la clav da scumpartiziun dals custs resguarda nov la populaziun da las vischnancas empè da las cifras da pernottaziuns sco oz.
Tuts han dad approvar per ch'i gartegia
Per che la nova societad d'aczias Engiadina San Murezzan Turissem daventia realitad, ston tut las 11 vischnancas da l'Engiadin'Ota e Bregaglia dir gea. I mancan anc 7 decisiuns.
Metter da la vart raps per investiziun «chasa da parcar Mareg»
Plinavant ha la radunanza communala approvà il rendaquint 2015 da la vischnanca da Zuoz. Quel serra cun in plus da bun 44'000 francs. Ella ha aderì a la proposta da la suprastanza communala da reservar in import da 1,2 milliuns francs sco prefinanziaziun per il parcadi Mareg. Il fabricat cumenza uss definitivamain ils 9 da matg 2016.
RR novitads 23:00/06:00