La veglia bandiera è stgarpada perquai preschentan els a l'occasiun da la festa da 60 onns giuventetgna Müstair ina nova, ma la claustra e la fatscha da Carl il Grond restan enavant sin quella. Tranter la giuventetgna da Müstair e la Claustra San Jon exista dapi 60 onns ina stretga collavuraziun. La giuventetgna sa participescha anc oz a las processiuns.
Pli baud aveva la claustra da dar il consentiment a la giuventetgna per realisar festas en la vischnanca. Plinavant dat il pader anc oz la benedicziun a tut las giuvnas e giuvens che vulan entrar en la societad da giuventetgna.
L'onn 1960 aveva la societad radund 40 commembras e commembers, quest dumber è creschì enfin 160 ed anc oz quinta la societad radund 70 commembras e commembers. Ils statuts stipulads avant 60 onns èn anc oz valabels.
Proxima fin d’emna ha lieu la gronda festa d’anniversari a Müstair cun blera musica, natiralmain adattada per giuvnas e giuvens.