700 chantadurs durant dus dis en la Valposchiavo

Ils cors dal Grischun dal sid s’inscuntran quest onn per la festa da chant districtuala en la Val Puschlav durant in’entira fin d’emna. Cun quai genereschan ils organisaturs er pernottaziuns en val.

Coro misto poschiavino Bild in Lightbox öffnen.

Legenda da maletgs: Il coro misto poschiavino è pront per la gronda festa en val. mad

Dad organisar ina festa da chant districtuala sur dus empè da be in di, saja stada la finamira dal Coro Misto Poschiavino che organisescha l’inscunter da las chantaduras ed ils chantadurs.

Uschia poss ins dad ina vart mussar a la glieud las bellezzas da la val ed al medem mument procurar per pernottaziuns en ils hotels ed abitaziuns da vacanzas ha declerà la commembra dal comité d’organisaziun, Claudia Fontana.

Occupà bain ils letgs en tut la val

Ch’ins haja pudì persvader ils hoteliers dad offrir las stanzas per in pretsch spezial als cors. In’idea cun success. Tut ils letgs dals hotels tranter Sfazù e Brusio èn occupads. Plirs chantadurs hajan er chattà alloschi tar persunas privatas.

Sursiglir cuntegn supplementar

Chant sonor

La festa da chant districtuala da Poschiavo tar RTR

Noss Chors: mardi, a las 19:00-20:00

07-06-2016, part 1

14-06-2016, part 2

21-06-2016, part 3

Sponsoring pli difficil

Per rabagliar ensemen il budget da bun 70’000 francs per la festa da chant districtuala a Poschiavo, haja il comité d’organisaziun gì da pitgar porta tar numerusas interpresas. Cun quai ch’els n’han betg chattà sponsurs principals, contribueschan uss radund 70 sponsurs pli pitschens la munaida basegnaivla.

Agid da tut las varts

Sustegn datti tenor Claudia Fontana er davart da la vischnanca da Poschiavo. Ils commembers da la musica da Poschiavo porschan er maun als chantadurs puschlavins, cun esser guida per ils 27 differents cors annunziads da l’Engiadina, la Val Müstair e la Val Bregaglia.

Mez da transport organisà

Sper las represchentaziuns da las chanzuns en las duas baselgias a Poschiavo la sonda e la dumengia, è prevesida ina gronda festa cun “Ballo liscio” la sonda saira tar la scola da Poschiavo ed in “Mercatino” la dumengia sin Plaz entamez Poschiavo. Per ch’il transport tranter plazzal da festa ed hotel en las singulas fracziuns funcziunescha er suenter ch’il tren da la Viafier Retica ha fatg ses ultim viadi la saira, datti in bus che circulescha mintga 30 minutas en val.

La festa da chant districtuala 2016 Incanto Valposchiavo, ha lieu ils 4 e 5 da zercladur a Poschiavo.