Durant la stad 2024 è vegnì bajegià in nov restaurant da muntogna per radund 20 milliuns francs, tenor il directur Andri Poo ina investiziun che fascheva da basegn.
Il restaurant da muntogna attira fitg blera glieud, quai è allegraivel.
La construcziun dal restaurant è vegnida a fin be curt avant l’avertura da la stagiun d’enviern 2024/25. Ins ha betg gì la pussaivladad da sa preparar optimal, uschia il directur, perquai n’ha betg tut funcziunà optimal. Schizunt èn entradas era criticas.
Ma ussa han ins gì il temp per far optimaziuns vi da l’infrastructura ed era tar il persunal preves'ins dad organisar meglier las structuras per daventar pli effizient.
Projects futurs
Sco proxim grond project preves'ins da demontar e bajegiar ina nova sutgera Mot da Ri. Quest project vegn a custar radund 3,5 milliuns francs e vegn realisà durant la stad 2026. Dal 2028 lura preves'ins da realisar er ina sutgera enstagl dals dus runals existents.
Istorgia dal restaurant
Avrir la boxSerrar la box
45 onns suenter la construcziun da la staziun da muntogna Motta Naluns han investì las Pendicularas Scuol SA 20 milliuns francs per la sanaziun totala.
Quest project è da gronda impurtanza per l'ulteriur svilup dal manaschi e per la regiun. Sco part central da la regiun da skis e sco restaurant il pli grond dal territori è quai per il manaschi dal territori da skis in pass impurtant per mantegnair il turissem d'enviern en l'Engiadina Bassa.
Cun ina sala d'occurrenzas per fin 400 persunas resulta qua per l'emprima giada ina pussaivladad per radunanzas ed eveniments che n'èn betg avant maun en la val.
