La radunanza communala ha approvà il rendaquint 2015 unanimamain. Quel serra cun in gudogn da bun 350'000 francs. Era ditg gea han ils 37 preschents a la vendita da la veglia chascharia da Ramosch per 250'000 francs. Nagina udida ha la radunanza dentant gì per la vendita da terrain (cun dretg da fabrica) en la zona da mastergn.
Il capo communal da Valsot, Victor Peer, ha preschentà ina bilantscha suenter ils emprims trais onns da la vischnanca fusiunada. Sper il fatg che Valsot ha pudì diminuir ils debits dad 11 sin 3 milliuns francs è er l’organisaziun communala da la nova vischnanca s’etablida bain.
Fatg or d’in minus in plus
La facultad netta da las anteriuras vischnancas importava il cumenzament dal 2013 in minus da 4'402 francs per abitant. Per la fin da l’onn passà ha la vischnanca da Valsot pudì preschentar ina facultad da 7’275 francs per abitant.
Betg anc sentiment d’unitad
Cumbain che las differentas cumissiuns e consorzis funcziunan bain en la vischnanca fusiunada, manca anc il sentiment da cuminanza tranter ils abitants da las duas fracziuns Tschlin e Ramosch. Che quai veglia bunamain in’entira generaziun ha declerà il president communal da Valsot.
Resta Victor Peer?
Sch'el sa metta a disposiziun per in’ulteriura perioda d'uffizi da 4 onns, n’ha Victor Peer anc betg vulì tradir. Ch’el sa laschia anc temp per ina decisiun fin la fin da zercladur.
Il squitsch e la responsabladad sajan creschids ils ultims onns enormamain. Ultra da quai haja sa midà il rapport tranter las instanzas communalas e la populaziun. Ch’ins haja d’avair ina pel fitg grossa per betg pigliar tut persunal, uschia Victor Peer.
RR actualitad bunura