Dapi dumengia èn ils radund 850 curridurs en gir cun la cursa Bike Transalp. La cursa è ida davent dad Imst en il Tirol (A) sur Nauders enfin Scuol. Mardi è stada la partenza per la terza etappa da Scuol a Livigno via S-charl ed il Pass dal Fuorn. La cursa ha set etappas cun ina distanza da bundant 500 kilometers e cun passa 17'000 meters d'autezza. Ils curridurs van sin pista en teams da duas persunas. La gronda part dals curridurs è da la Germania, dentant era da la Svizra, l'Italia, l'Austria, l'Ollandia e da la Belgia èn bain represchentads. Dentant datti era singuls participants per exempel da Lesotho, dal Nepal u da Costa Rica.
Sfida logistica
Per il comité d'organisaziun dal lieu d'etappa a Scuol è l'eveniment stà ina sfida logistica. Ils 850 curridurs ed era tut l'entourage han stuì durmir en la regiun ed era tut ils fabricats ed aspects da segirtad sin l'areal da partenza han ins stuì preparar bain. Suenter il start han ils organisaturs stuì demontar fitg spert tut l'infrastructura. Quella sto esser pronta gia il suentermezdi puspè a Livigno tar l'arrivada da la terza etappa.
RR actualitad 09:00