Siglir tar il cuntegn

Engiadina 92'000 francs per ina terrada

Per il cas ch’in president communal en uffizi na vegn betg pli reelegì, datti differentas soluziuns en il chantun Grischun. Entant ch’i dess a San Murezzan in plimatsch finanzial confortabel, n’è a Poschiavo prevesì nagina indemnisaziun.

mantun da bancnotas da 50, da 20 e da 10 francs
Legenda: Tscherts presidents communals dal GR survegnan ina indemnisaziun sch'els na vegnan betg pli reelegids, ils blers però na survegnan nagut. Keystone

A San Murezzan dessi stgars in mez milliun francs fin tar la pensiun u 92’000 francs ad onn ils proxims tschintg onns. Quai en il cas ch’il president communal en uffizi, na vegniss betg pli reelegì ils 23 da settember 2018. A Poschiavo na dessi percunter nagut en il cas ch’il capo communal actual perdess il cumbat electoral.

Differents reglaments d’indemnisaziun

La lescha communala da San Murezzan a reguard la remuneraziun da politichers è dal 1992. A maun d’ina glista è definì precis tge ch’i capita en il cas ch’in president communal na vegniss betg pli reelegì. Tut tenor vegliadetgna e durada dal temp en uffizi è l’indemnisaziun different auta.

San Murezzan, Tavau, Cuira

Las pli paucas vischnancas enconuschan in reglament sumegliant a quel da San Murezzan. A Tavau dessi in import marcantamain pli bass, numnadamain 50% da la paja e quai per in onn. Per betg pli esser vegnì reelegì a Cuira datti 64’000 francs, quai èn bun 30’000 francs damain che a San Murezzan.

RR actualitad 17:00