Il plan oriund era da laschar sgular il ballun meteorologic en in'autezza da 30’000 meters da Bienna en l'Engiadina, dentant n'èsi betg stà pussaivel da numnar l’Engiadina sco finamira pervia dal ferm vent. Era da partir da Samedan n'è betg stà pussaivel pervia da la plazza aviatica. Uschia han els avant circa trais mais entschavì da lavurar en differentas gruppas, per exempel ina che guarda che tut constat giuridicamain, ina che s’infurmescha da l’atmosfera, ina gruppa da salvament ed ina da medias.
Nus ans essan adina legrads sin quest project, era sch'i tuna absurd da laschar sgular in ballun.
Per la classa finala èsi stà ina sfida da far ina segiranza per il ballun che custa 2’000 francs, cunquai ch’els eran betg 18 onns vegls. Ed era da sclerir giu tut giuridicamain, era cun ils pajais vischins sco l’Italia u la Frantscha. Pertge ch'il ballun savess sgular enfin 400 kilometers.
La Svizra è pitschna ed uschia è il risico aut ch'il ballun sgola en l’Italia u en la Frantscha.
Il viadi
Il ballun meteorologic è partì a Bienna ed a l’entschatta ha tut funcziunà. Il pais da las cameras ha el tegnì ed il signal da GPS è arrivà sin il telefonin. Ils scolars e las scolaras han vesì ch'il ballun sgola en direcziun dal Lai da Neuchâtel. Suenter è la colliaziun ruta e pir suenter 222 kilometers han els vesì ch'il ballun è sa platgà al pe dal glatscher d’Aletsch. Il motiv ch'il ballun n'è betg arrivà fin a Brig era ch'il helium n'ha betg tanschì. L’ultima sfida è anc stada da salvar il ballun, gnanc uschè simpel cun quai ch'era il team da salvament na ha pudì ir sin il glatscher pervia dal ristg da lavinas. Per fortuna è in helicopter sgulà en questa direcziun ed ha pudì ir per il ballun. Uss spetga la classa finala da l’Academia Engiadina sin il ballun ch'arriva per posta.
